ਪੀ.ਏ.ਯੂ. ਦੇ ਵਿਦਿਆਰਥੀਆਂ ਨੇ ਜਿੱਤਿਆ ਰਾਸ਼ਟਰੀ ਪੱਧਰੀ ਮੁਕਾਬਲਾ

ਲੁਧਿਆਣਾ : ਪੀ.ਏ.ਯੂ. ਦੇ ਕਾਲਜ ਆਫ ਐਗਰੀਕਲਚਰਲ ਇੰਜਨੀਅਰਿੰਗ ਐਂਡ ਟੈਕਨਾਲੋਜੀ ਦੀ 20 ਮੈਂਬਰਾਂ ਦੀ ਟੀਮ ਨੇ ਹੀਰੋ ਈ ਬਾਈਕ ਚੈਲੇਂਜ ਦੇ ਰਾਸਟਰੀ ਪੱਧਰ ਦੇ ਮੁਕਾਬਲੇ ਵਿੱਚ ਫਿਊਚਰ ਐਵਾਰਡ ਜਿੱਤਿਆ | ਜ਼ਿਕਰਯੋਗ ਹੈ ਕਿ ਈ-ਬਾਈਕ ਚੈਲੇਂਜ ਹੀਰੋ ਇੰਡੀਆ ਦੁਆਰਾ ਆਯੋਜਿਤ ਇੱਕ ਰਾਸਟਰੀ ਪੱਧਰ ਦਾ ਮੁਕਾਬਲਾ ਹੈ ਜਿਸ ਵਿੱਚ ਆਖਰੀ ਗੇੜ ਲਈ ਕੁਆਲੀਫਾਈ ਕਰਨ ਵਾਲੀਆਂ ਟੀਮਾਂ ਨੂੰ ਇੱਕ ਈ-ਬਾਈਕ ਵਿਕਸਤ ਕਰਨੀ ਪੈਂਦੀ ਹੈ ਜਿਸਨੂੰ ਅੰਤਮ ਦੌਰ ਵਿੱਚ ਔਖੇ ਹਾਲਾਤ ਅਧੀਨ ਪਰਖਿਆ ਜਾਂਦਾ ਹੈ |

ਬੀਤੇ ਦਿਨੀਂ ਇਹ ਅਖਰੀ ਗੇੜ ਦੇ ਪਰਖ ਮੁਕਾਬਲੇ ਨੋਇਡਾ ਦੀ ਗਲਗੋਟੀਆ ਯੂਨੀਵਰਸਿਟੀ ਵਿੱਚ ਕਰਵਾਏ ਗਏ ਸਨ | ਪੀਏਯੂ ਦੇ ਵਾਈਸ ਚਾਂਸਲਰ, ਡਾ ਸਤਿਬੀਰ ਸਿੰਘ ਗੋਸਲ ਨੇ ਟੀਮ ਨੂੰ ਵਧਾਈ ਦਿੱਤੀ ਅਤੇ ਵਿਦਿਆਰਥੀਆਂ ਦੇ ਸਾਂਝੇ ਯਤਨਾਂ ਦੀ ਸ਼ਲਾਘਾ ਕੀਤੀ | ਉਹਨਾਂ ਨੇ ਅਨੁਸਾਸਨ, ਸਮਰਪਣ ਅਤੇ ਦ੍ਰਿੜਤਾ ਦੀ ਭਾਵਨਾ ਨੂੰ ਵਿਕਸਤ ਕਰਕੇ ਵਿਸਵ ਪੱਧਰ ਤੇ ਕਾਮਯਾਬੀ ਦੀ ਯੋਗਤਾ ਹਾਸਲ ਕਰਨ ’ਤੇ ਜੋਰ ਦਿੱਤਾ|