ਲੁਧਿਆਣਾ ‘ਚ ਗਲਾਡਾ ਨੇ 5 ਨਾਜਾਇਜ਼ ਕਾਲੋਨੀਆਂ ‘ਤੇ ਚਲਾਇਆ ਪੀਲਾ ਪੰਜਾਂ

ਲੁਧਿਆਣਾ :  ਲੁਧਿਆਣਾ ‘ਚ ਗਲਾਡਾ ਨੇ ਵਧੀਕ ਮੁੱਖ ਪ੍ਰਸ਼ਾਸਕ ਗਲਾਡਾ ਦੇ ਹੁਕਮਾਂ ਅਨੁਸਾਰ 5 ਨਾਜਾਇਜ਼ ਕਾਲੋਨੀਆਂ ਢਾਹ ਦਿੱਤੀਆਂ । ਇਨ੍ਹਾਂ ਅਣਅਧਿਕਾਰਤ ਕਲੋਨੀਆਂ ਨੂੰ ਪੀਏਪੀਆਰ ਐਕਟ 1995 (ਸੋਧ-2014) ਦੀ ਧਾਰਾ 39 ਤਹਿਤ ਪਹਿਲਾਂ ਹੀ ਨੋਟਿਸ ਜਾਰੀ ਕੀਤੇ ਜਾ ਚੁੱਕੇ ਹਨ।

ਹੁਕਮਾਂ ਅਨੁਸਾਰ ਡਾ ਬਲਵਿੰਦਰ ਸਿੰਘ ਢਿੱਲੋਂ, ਅਸਟੇਟ ਅਫ਼ਸਰ (ਰੈਗੂਲੇਟਰੀ) ਗਲਾਡਾ ਅਤੇ ਚਾਰ ਐਸ ਡੀ ਈ ਗਲਾਡਾ ਰਾਜੇਸ਼ ਮਹਾਜਨ ਐਸ ਡੀ ਈ, ਜਤਿੰਦਰ ਪਾਲ ਸਿੰਘ ਐਸ ਡੀ ਈ, ਹਰਸਮਿੰਦਰ ਸਿੰਘ ਐਸ ਡੀ ਈ, ਅਸ਼ੀਸ਼ ਵਾਚਰ ਐਸ ਡੀ ਈ ਦੀ ਨਿਗਰਾਨੀ ਹੇਠ 3 ਜੇ ਈ ਅਤੇ ਡਿਊਟੀ ਮੈਜਿਸਟ੍ਰੇਟ ਸ੍ਰੀਮਤੀ ਮਨਵੀਰ ਕੌਰ ਸਿੱਧੂ ਨਾਇਬ ਤਹਿਸੀਲਦਾਰ ਸਾਹਨੇਵਾਲ ਸਮੇਤ ਪੁਲਿਸ ਫੋਰਸ ਸਮੇਤ ਇਕ ਵਿਸ਼ੇਸ਼ ਢਾਹੁਣ ਵਾਲੀ ਟੀਮ ਦਾ ਗਠਨ ਕੀਤਾ ਗਿਆ ਹੈ ।

ਢਾਹੁਣ ਦੀ ਸਾਰੀ ਮੁਹਿੰਮ ਦੀ ਯੋਜਨਾ ਸ੍ਰੀਮਤੀ ਅਮਰਪ੍ਰੀਤ ਕੌਰ ਸੰਧੂ ਆਈ.ਏ.ਐਸ. ਦੀ ਮੁੱਖ ਪ੍ਰਸ਼ਾਸਕ ਗਲਾਡਾ, ਲੁਧਿਆਣਾ ਨੇ ਬਣਾਈ ਸੀ । ਇਸ ਢਾਹੁਣ ਦੀ ਕਾਰਵਾਈ ਵਿਚ ਗਲਾਡਾ ਨੇ 3 ਪਿੰਡਾਂ ਜਸਪਾਲ ਬਾਂਗਰ, ਧਰੌੜ ਅਤੇ ਮਜਾਰਾ ਦੀਆਂ 5 ਕਾਲੋਨੀਆਂ ਢਾਹ ਦਿੱਤੀਆਂ।

ਗਲਾਡਾ ਆਉਣ ਵਾਲੇ ਹਫ਼ਤਿਆਂ ਵਿੱਚ ਹੋਰ ਢਾਹੁਣ ਵਾਲੀਆਂ ਮੁਹਿੰਮਾਂ ਦੀ ਵੀ ਯੋਜਨਾ ਬਣਾ ਰਿਹਾ ਹੈ। ਮੁੱਖ ਪ੍ਰਸ਼ਾਸਕ ਗਲਾਡਾ ਵੱਲੋਂ ਆਮ ਲੋਕਾਂ ਨੂੰ ਅਣਅਧਿਕਾਰਤ ਕਲੋਨੀਆਂ ਵਿੱਚ ਜਾਇਦਾਦ/ਪਲਾਟ/ਇਮਾਰਤਾਂ ਨਾ ਖਰੀਦਣ ਦੀ ਅਪੀਲ ਕੀਤੀ ਗਈ। ਗਲਾਡਾ ਵਾਟਰ ਸਪਲਾਈ, ਸੀਵਰੇਜ, ਬਿਜਲੀ ਕੁਨੈਕਸ਼ਨ, ਸਟਰੀਟ ਲਾਈਟਾਂ ਆਦਿ ਵਰਗੀ ਕੋਈ ਵੀ ਸਹੂਲਤ ਮੁਹੱਈਆ ਨਹੀਂ ਕਰਵਾਏਗੀ।