NSPS ਦੇ ਕ੍ਰਿਕਟਰ ਕਰਨਵੀਰ ਸਿੰਘ ਨੇ PCA ਵੱਲੋਂ ਕਰਵਾਏ ਮੁਕਾਬਲਿਆਂ ‘ਚ ਕੀਤਾ ਸ਼ਾਨਦਾਰ ਪ੍ਰਦਰਸ਼ਨ

ਲੁਧਿਆਣਾ : ਨਨਕਾਣਾ ਸਾਹਿਬ ਪਬਲਿਕ ਸਕੂਲ, ਗਿੱਲ ਪਾਰਕ ਲੁਧਿਆਣਾ ਦੇ ਉਭਰਦੇ ਕ੍ਰਿਕਟਰ ਕਰਨਵੀਰ ਸਿੰਘ ਨੇ ਪੰਜਾਬ ਕ੍ਰਿਕਟ ਐਸੋਸੀਏਸ਼ਨ ਵੱਲੋਂ ਕਰਵਾਏ ਵੱਖ-ਵੱਖ ਪੱਧਰ ਦੇ ਮੁਕਾਬਲਿਆਂ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਸਕੂਲ ਦਾ ਨਾਂ ਰੌਸ਼ਨ ਕੀਤਾ। ਜ਼ਿਲ੍ਹਾ ਪੱਧਰੀ ਅੰਡਰ-16 ਐਮ ਐਲ ਮਾਰਕਰ ਟਰਾਫੀ ਵਿੱਚ ਦਸਵੀਂ ਜਮਾਤ ਦੇ ਵਿਦਿਆਰਥੀ ਕਰਨਵੀਰ ਨੇ ਇੱਕ ਮੈਚ ਵਿੱਚ 80 ਦੌੜਾਂ ਬਣਾਈਆਂ ਅਤੇ ਪੰਜ ਵਿਕਟਾਂ ਹਾਸਲ ਕੀਤੀਆਂ। ਉਸ ਦੇ ਪ੍ਰਦਰਸ਼ਨ ਦੇ ਆਧਾਰ ‘ਤੇ ਉਹ ਜ਼ੋਨਲ ਪੱਧਰ ਦੇ ਟੂਰਨਾਮੈਂਟ ਲਈ ਚੁਣਿਆ ਗਿਆ।

ਇਸ ਮੁਕਾਬਲੇ ਵਿੱਚ ਪੰਜਾਬ ਕ੍ਰਿਕੇਟ ਐਸੋਸੀਏਸ਼ਨ ਨੇ ਚਾਰ ਟੀਮਾਂ ਪੰਜਾਬ ਗਰੀਨ, ਬਲੂ, ਰੈੱਡ ਅਤੇ ਯੈਲੋ ਟੀਮਾਂ ਬਣਾਈਆਂ। ਕਰਨਵੀਰ ਪੰਜਾਬ ਰੈੱਡ ਟੀਮ ਲਈ ਚੁਣਿਆ ਗਿਆ। ਇਸ ਟੀਮ ਲਈ ਲੁਧਿਆਣੇ ਤੋਂ ਸਿਰਫ਼ ਤਿੰਨ ਖਿਡਾਰੀ ਚੁਣੇ ਗਏ ਸਨ ਅਤੇ ਕਰਨਵੀਰ ਵੀ ਉਨ੍ਹਾਂ ਵਿੱਚੋਂ ਇੱਕ ਸੀ। ਜਦਕਿ ਪੰਜਾਬ ਯੈਲੋ ਅਤੇ ਪੰਜਾਬ ਬਲੂ ਖਿਲਾਫ ਬਹੁਤ ਵਧੀਆ ਪ੍ਰਦਰਸ਼ਨ ਕੀਤਾ। ਇਸ ਉਭਰਦੇ ਕ੍ਰਿਕਟਰ ਨੇ ਕ੍ਰਮਵਾਰ 6 ਅਤੇ 2 ਵਿਕਟਾਂ ਹਾਸਲ ਕੀਤੀਆਂ। ਉਹ ਤੇਜ਼ ਗੇਂਦਬਾਜ਼ੀ ਵਰਗ ਵਿੱਚ ਟੂਰਨਾਮੈਂਟ ਵਿੱਚ ਸਭ ਤੋਂ ਵੱਧ ਵਿਕਟਾਂ ਲੈਣ ਵਾਲਾ ਗੇਂਦਬਾਜ਼ ਹੈ।