ਲੁਧਿਆਣਾ : ਪੂਰੀ ਦੁਨੀਆ ਲਈ ਚਿੰਤਾ ਦਾ ਵਿਸ਼ਾ ਬਣੀ ਯੂਕਰੇਨ-ਰੂਸ ਜੰਗ ਨੇ ਪੰਜਾਬ ਦੇ ਉਦਯੋਗਾਂ ਨੂੰ ਵੀ ਪ੍ਰਭਾਵਿਤ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਪਿਛਲੇ ੩ ਮਹੀਨਿਆਂ ਵਿੱਚ ਰਾਜ ਤੋਂ ਨਿਰਯਾਤ ਕੀਤੇ ਗਏ 1100 ਕਰੋੜ ਰੁਪਏ ਦੇ ਆਰਡਰਾਂ ਵਿੱਚ 800 ਕਰੋੜ ਰੁਪਏ ਦੀ ਅਦਾਇਗੀ ਰੁੱਕ ਗਈ ਹੈ। ਇਸ ਕਾਰਨ ਕਾਰੋਬਾਰੀਆਂ ਨੂੰ ਆਰਥਿਕ ਨੁਕਸਾਨ ਦਾ ਡਰ ਸਤਾ ਰਿਹਾ ਹੈ।
ਹਾਲ ਹੀ ਵਿੱਚ ਕੇਂਦਰ ਸਰਕਾਰ ਦੀ ਈਸੀਜੀਸੀ ਸਕੀਮ ਵੀ 25 ਫਰਵਰੀ ਨੂੰ ਵਾਪਸ ਲੈ ਲਈ ਗਈ ਸੀ। ਇਸ ਦੇ ਨਾਲ ਹੀ ਪੰਜ ਮੁੱਖ ਬੈਂਕਾਂ ਵੱਲੋਂ ਸਵਿਫਟ ਬੈਂਕ ਵਿੱਚ ਲੈਣ-ਦੇਣ ਬੰਦ ਹੋਣ ਨਾਲ ਨਿਰਯਾਤਕਾਂ ਦੀ 800 ਕਰੋੜ ਰੁਪਏ ਦੀ ਰਕਮ ਬੰਦ ਹੋ ਜਾਵੇਗੀ। ਇਸ ਵਿੱਚ ਕਈ ਮਹੱਤਵਪੂਰਨ ਉਤਪਾਦਾਂ ਦੀਆਂ ਨਿਰਯਾਤ ਇਕਾਈਆਂ ਸ਼ਾਮਲ ਹਨ, ਜਿਨ੍ਹਾਂ ਵਿੱਚ ਇੰਜੀਨੀਅਰਿੰਗ ਦੇ ਸਮਾਨ ਤੋਂ ਲੈ ਕੇ ਪੰਜਾਬ ਦੇ ਹੈਂਡ ਟੂਲਜ਼ ਸ਼ਾਮਲ ਹਨ।
ਸਨਅਤਕਾਰਾਂ ਨੇ ਕੇਂਦਰ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਪ੍ਰੇਸ਼ਾਨੀ ਦੀ ਇਸ ਸਥਿਤੀ ਵਿਚ ਉਨ੍ਹਾਂ ਦਾ ਫਸਿਆ ਪੈਸਾ ਵਾਪਸ ਲਿਆ ਜਾਵੇ ਜਾਂ ਇਸ ਦੇ ਆਧਾਰ ਤੇ ਉਨ੍ਹਾਂ ਨੂੰ ਰਾਹਤ ਦਿੱਤੀ ਜਾਵੇ। ਪੰਜਾਬ ਤੋਂ ਯੂਕਰੇਨ ਅਤੇ ਰੂਸ ਨੂੰ ਹੋਣ ਵਾਲੀ ਬਰਾਮਦ ਦੀ ਗੱਲ ਕਰੀਏ ਤਾਂ ਹਰ ਸਾਲ ਪੰਜਾਬ ਤੋਂ ਇਨ੍ਹਾਂ ਦੋਵਾਂ ਦੇਸ਼ਾਂ ਨੂੰ ਲਗਭਗ 1500 ਕਰੋੜ ਦੀ ਬਰਾਮਦ ਹੁੰਦੀ ਹੈ। ਦਰਾਮਦ ਦੀ ਗੱਲ ਕਰੀਏ ਤਾਂ ਤੇਲ ਨਾਲ ਜੁੜੇ ਕਈ ਉਤਪਾਦ 14000 ਕਰੋੜ ਦੇ ਕਰੀਬ ਦਰਾਮਦ ਕੀਤੇ ਜਾਂਦੇ ਹਨ।
ਆਲ ਇੰਡਸਟਰੀ ਐਂਡ ਟਰੇਡ ਫੋਰਮ ਦੇ ਪ੍ਰਧਾਨ ਬਦੀਸ਼ ਜਿੰਦਲ ਨੇ ਕਿਹਾ ਕਿ ਸਰਕਾਰ ਵੱਲੋਂ ਦਿੱਤੀ ਗਈ ਗਾਰੰਟੀ ਸਕੀਮ ਵੀ ਬੰਦ ਕਰ ਦਿੱਤੀ ਗਈ ਹੈ। ਅਜਿਹੇ ‘ਚ ਫੰਡ ਬੰਦ ਹੋਣ ਕਾਰਨ ਬਰਾਮਦਕਾਰਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਵੇਗਾ। ਮੇਕ ਇਨ ਇੰਡੀਆ ਨੂੰ ਹੁਲਾਰਾ ਦੇਣ ਲਈ ਕੰਪਨੀਆਂ ਦੁਆਰਾ ਵੱਖ-ਵੱਖ ਦੇਸ਼ਾਂ ਨੂੰ ਨਿਰਯਾਤ ਕੀਤਾ ਜਾਂਦਾ ਹੈ। ਹੁਣ ਅਜਿਹੀ ਗੰਭੀਰ ਸਥਿਤੀ ਚ ਸਰਕਾਰ ਨੂੰ ਅੱਗੇ ਆ ਕੇ ਇੰਡਸਟਰੀ ਦੀ ਮਦਦ ਕਰਨੀ ਚਾਹੀਦੀ ਹੈ।