ਜਾਨਵਰਾਂ ਦੇ ਅੰਗਾਂ ਦੇ 2 ਤਸਕਰ ਕਾਬੂ, ਲੋਕਾਂ ਨੂੰ ਮੂਰਖ ਬਣਾ ਵਸੂਲਦੇ ਸਨ ਮੋਟੀ ਰਕਮ

ਲੁਧਿਆਣਾ : ਲੁਧਿਆਣਾ ਵਿੱਚ ਹੈਲਪ ਫਾਰ ਐਨੀਮਲਜ਼ ਦੇ ਮੈਂਬਰਾਂ ਨੇ ਦੋ ਸਪੇਰਿਆਂ ਨੂੰ ਕਾਬੂ ਕਰਕੇ ਵਾਈਲਡ ਲਾਈਫ ਦੇ ਹਵਾਲੇ ਕੀਤਾ ਗਿਆ। ਦੱਸ ਦੇਈਏ ਕਿ ਇਨ੍ਹਾਂ ਦੋਵਾਂ ਨੌਜਵਾਨਾਂ ਨੂੰ ਥਾਣਾ ਡਵੀਜ਼ਨ ਨੰਬਰ 3 ਦੀ ਪੁਲਿਸ ਨੇ ਫ਼ਿਰੋਜ਼ ਗਾਂਧੀ ਮਾਰਕੀਟ ਤੋਂ ਗ੍ਰਿਫ਼ਤਾਰ ਕੀਤਾ ਹੈ। ਦੋਵਾਂ ਮੁਲਜ਼ਮਾਂ ‘ਤੇ ਦੋਸ਼ ਹੈ ਕਿ ਉਹ ਲੋਕਾਂ ਨੂੰ ਮੂਰਖ ਬਣਾ ਕੇ ਜਾਨਵਰਾਂ ਦੇ ਪੰਜੇ ਅਤੇ ਹੋਰ ਅੰਗ ਵੇਚਦੇ ਸਨ। ਇਹ ਦੋਸ਼ੀ ਬਿੱਲੀ ਅਤੇ ਉੱਲੂ ਦੇ ਪੰਜੇ ‘ਤੇ ਸਿੰਦੂਰ ਲਗਾ ਕੇ ਇਸ ਨੂੰ ਗਿੱਦੜਸਿੰਘੀ ਕਹਿ ਕੇ ਮਹਿੰਗੇ ਮੁੱਲ ‘ਤੇ ਵੇਚਦੇ ਸਨ। ਹੈਲਪ ਫਾਰ ਐਨੀਮਲਜ਼ ਦੇ ਮੈਂਬਰ ਮਨੀ ਨੇ ਮੁਲਜ਼ਮ ਨੂੰ ਫਿਰੋਜ਼ਗਾਂਧੀ ਬਾਜ਼ਾਰ ਵਿੱਚ ਘੁੰਮਦੇ ਦੇਖਿਆ।

ਮਨੀ ਨੇ ਕਿਹਾ ਕਿ ਇਸ ਤਰ੍ਹਾਂ ਜਾਨਵਰਾਂ ਦੇ ਅੰਗਾਂ ਦੀ ਤਸਕਰੀ ਕਰਨਾ ਅਪਰਾਧ ਹੈ। ਇਸ ਦੇ ਨਾਲ ਹੀ ਸਪੇਰਿਆਂ ਕੋਲੋਂ ਦੋ ਸੱਪ ਵੀ ਮਿਲੇ ਹਨ। ਦੋਸ਼ੀ ਖੁਦ ਲੋਕਾਂ ਦੇ ਘਰਾਂ ਦੇ ਨੇੜੇ ਸੱਪ ਛੱਡ ਦਿੰਦੇ ਸਨ। ਬਾਅਦ ਵਿੱਚ ਜਦੋਂ ਲੋਕਾਂ ਨੇ ਸਪੇਰਿਆਂ ਨੂੰ ਬੁਲਾਉਣ ਦੀ ਗੱਲ ਕੀਤੀ ਤਾਂ ਉਹ ਖੁਦ ਆ ਕੇ ਸੱਪ ਫੜ ਕੇ ਲੋਕਾਂ ਤੋਂ ਮੋਟੀ ਰਕਮ ਵਸੂਲਦੇ ਸਨ। ਜੰਗਲੀ ਜੀਵ ਰੇਂਜ ਅਧਿਕਾਰੀ ਸ਼ਮਿੰਦਰ ਸਿੰਘ ਮੌਕੇ ’ਤੇ ਪੁੱਜੇ। ਸ਼ਮਿੰਦਰ ਨੇ ਥਾਣਾ ਡਿਵੀਜ਼ਨ ਨੰਬਰ 5 ਦੀ ਪੁਲਿਸ ਨੂੰ ਫੋਨ ਕੀਤਾ। ਪੁਲਿਸ ਨੇ ਦੋਵਾਂ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਹੈ। ਮੁਲਜ਼ਮਾਂ ਦੀ ਪਛਾਣ ਮਨੋਜ ਨਾਥ ਅਤੇ ਸੁਨੀਲ ਨਾਥ ਵਜੋਂ ਹੋਈ ਹੈ।