ਆਈਫੋਨ ਬਣਿਆ ਇਸ ਖ਼ੂਬਸੂਰਤ ਮਾਡਲ ਦੀ ਦਰਦਨਾਕ ਮੌਤ ਦਾ ਕਾਰਨ

ਰੂਸ ਦੀ ਇੱਕ ਮਾਡਲ ਦੀ ਦਰਦਨਾਕ ਮੌਤ ਦਾ ਕਾਰਨ ਉਸ ਦਾ ਆਈਫੋਨ ਬਣ ਗਿਆ। ਇਸ ਮਾਡਲ ਨੇ ਬਾਥਟਬ ’ਚ ਨਹਾਉਣ ਦੌਰਾਨ ਆਪਣਾ ਫੋਨ ਚਾਰਜਿੰਗ ਤੇ ਲਗਾਇਆ ਸੀ ਅਤੇ ਲੇਟ ਕੇ ਉਸ ਦਾ ਇਸਤੇਮਾਲ ਕਰ ਰਹੀ ਸੀ। ਇਸ ਦੌਰਾਨ ਫੋਨ ਹੱਥ ’ਚੋਂ ਛੁਟ ਕੇ ਪਾਣੀ ’ਚ ਡਿੱਗ ਗਿਆ ਅਤੇ ਬਿਜਲੀ ਦਾ ਤੇਜ਼ ਝਟਕਾ ਲੱਗਣ ਨਾਲ ਉਸ ਦੀ ਮੌਕੇ ਤੇ ਹੀ ਮੌਤ ਹੋ ਗਈ। ਇੱਕ ਰਿਪੋਰਟ ਮੁਤਾਬਕ 24 ਸਾਲਾਂ ਮਾਡਲ ਓਲੇਸਾ ਸੇਮੇਨੋਵਾ ਰੂਸ ਦੇ ਅਰਖੰਗੇਲਸਕ ਸ਼ਹਿਰ ’ਚ ਆਪਣੀ ਇੱਕ ਦੋਸਤ ਨਾਲ ਰਹਿ ਰਹੀ ਸੀ।

ਮੰਗਲਵਾਰ ਨੂੰ ਜਦੋਂ ਉਸ ਦੀ ਦੋਸਤ ਘਰ ਪਹੁੰਚੀ ਤਾਂ ਉਸ ਨੂੰ ਲੱਗਾ ਕਿ ਓਲੇਸਾ ਕਿਤੇ ਬਾਹਰ ਗਈ ਹੋਈ ਹੈ। ਹਾਲਾਂਕਿ ਜਿਵੇਂ ਹੀ ਉਹ ਬਾਥਰੂਮ ’ਚ ਗਈ ਤਾਂ ਉਸ ਦੇ ਹੋਸ਼ ਉਡ ਗਏ। ਦੋਸਤ ਦਾਰਿਆ ਨੇ ਦੱਸਿਆ ਕਿ ਓਲੇਸਾ ਪੂਰੀ ਤਰ੍ਹਾਂ ਪੀਲੀ ਪੈ ਗਈ ਸੀ ਅਤੇ ਉਹ ਸਾਹ ਵੀ ਨਹੀਂ ਲੈ ਰਹੀ ਸੀ। ਇਸ ਤੋਂ ਬਾਅਦ ਉਸਨੇ ਪੁਲਿਸ ਨੂੰ ਫੋਨ ਕੀਤਾ। ਦੋਸਤ ਨੇ ਦੱਸਿਆ ਕਿ ਮੈਂ ਉਸ ਨੂੰ ਛੂਹ ਕੇ ਵੇਖਣ ਦੀ ਕੋਸ਼ਿਸ਼ ਕੀਤੀ ਤਾਂ ਮੈਨੂੰ ਵੀ ਬਿਜਲੀ ਦਾ ਝਟਕਾ ਲੱਗਾ। ਉਸ ਦਾ ਫੋਨ ਪਾਣੀ ’ਚ ਪਿਆ ਸੀ ਅਤੇ ਚਾਰਜਿੰਗ ਤੇ ਲੱਗਾ ਹੋਇਆ ਸੀ। ਜਾਂਚ ’ਚ ਸਾਹਮਣੇ ਆਇਆ ਹੈ ਕਿ ਓਲੇਸਾ ਦੀ ਮੌਤ ਕਰੰਟ ਲੱਗਣ ਨਾਲ ਹੀ ਹੋਈ ਹੈ।

ਓਲੇਸਾ ਨੇ ਫੋਨ ਚਾਰਜਿੰਗ ਲਈ ਜਿਸ ਸਾਕੇਟ ਦਾ ਇਸਤੇਮਾਲ ਕੀਤਾ ਸੀ ਉਹ ਮੇਨ ਲਾਈਨ ਸੀ ਅਤੇ ਉਸ ਦਾ ਆਈਫੋਨ 8 ਪਾਣੀ ’ਚ ਡਿੱਗ ਗਿਆ ਸੀ। ਓਲੇਸਾ ਹਮੇਸ਼ਾ ਬਾਥਟਬ ’ਚ ਬੈਠ ਕੇ ਵੀਡੀਓ ਬਣਾਉਂਦੀ ਸੀ ਅਤੇ ਇਸੇ ਦੌਰਾਨ ਸ਼ਾਇਦ ਇਹ ਹਾਦਸਾ ਵੀ ਹੋਇਆ। ਜਾਣਕਾਰਾਂ ਮੁਤਾਬਕ ਜੇਕਰ ਸਾਕੇਟ ਮੇਨ ਲਾਈਨ ਦਾ ਨਹੀਂ ਹੁੰਦਾ ਤਾਂ ਸ਼ਾਰਟ ਸਰਕਿਟ ਤੋਂ ਬਾਅਦ ਓਲੇਸਾ ਦੀ ਜਾਨ ਬਚਾਈ ਜਾ ਸਕਦੀ ਸੀ। ਫੋਨ ਬੰਦ ਹੋ ਸਕਦਾ ਸੀ ਪਰ ਵਾਟਰਪਰੂਫ ਹੋਣ ਦੇ ਚਲਦੇ ਉਹ ਕਾਫੀ ਦੇਰ ਤਕ ਆਨ ਹੀ ਰਿਹਾ ਅਤੇ ਚਾਰਜਰ ਵੀ ਕੰਮ ਕਰਦਾ ਰਿਹਾ। ਇਸ ਤੋਂ ਪਹਿਲਾਂ ਅਗਸਤ ’ਚ 15 ਸਾਲ ਦੀ ਸਕੂਲ ਗਰਲ ਐਨਾ ਦੀ ਵੀ ਕੁੱਝ ਇਸੇ ਤਰ੍ਹਾਂ ਮੌਤ ਹੋ ਗਈ ਸੀ।

Source: jagbani