ਭਾਰਤ ਦੀ ਇਹ ਮਸ਼ਹੂਰ ਮਠਿਆਈ ਦੇ ਵਿਦੇਸ਼ਾਂ ਤੱਕ ਚਰਚੇ, ਅਮਰੀਕਾ ‘ਚ 7500 ਰੁਪਏ ਕਿਲੋ

ਅੱਜ-ਕੱਲ੍ਹ ਬਿਹਾਰ ਦੀ ਇੱਕ ਮਠਿਆਈ ਦੇਸ਼ ਹੀ ਨਹੀਂ ਬਲਕਿ ਵਿਦੇਸ਼ਾਂ ਵਿੱਚ ਵੀ ਚਰਚਾ ਵਿੱਚ ਹੈ। ਭਾਰਤੀ ਭਾਵੇਂ ਅਮਰੀਕਾ ਜਾਂ ਸਵੀਡਨ ਵਿੱਚ ਹੋਣ ਇਹ ਮਿਠਿਆਈ ਇੰਨੀ ਚੰਗੀ ਲੱਗ ਰਹੀ ਹੈ ਕਿ ਹੁਣ ਇਹ ਵਿਦੇਸ਼ਾਂ ‘ਚ ਵੀ ਜਾਣ ਲੱਗੀ ਹੈ। ਅਮਰੀਕਾ ਵਿੱਚ ਇਸ ਮਠਿਆਈ ਦੀ ਕੀਮਤ 7500 ਰੁਪਏ ਪ੍ਰਤੀ ਕਿੱਲੋ ਹੈ। ਇਸ ਮਠਿਆਈ ਨੂੰ ਸਾਬਕਾ ਪ੍ਰਧਾਨ ਮੰਤਰੀ ਮਰਹੂਮ ਅਟਲ ਬਿਹਾਰੀ ਬਾਜਪਾਈ ਜੀ ਵੀ ਬਹੁਤ ਪਸੰਦ ਕਰਦੇ ਸੀ। ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਵੀ ਇਸ ਮਠਿਆਈ ਵਿੱਚ ਦਿਲਚਸਪੀ ਰੱਖਦੇ ਹਨ। ਇਸ ਮਠਿਆਈ ਦਾ ਨਾਮ ‘ਖਾਜਾ’ ਹੈ। ਹੁਣ ਇਸ ਮਿਠਿਆਈ ਨੂੰ ਨਾ ਸਿਰਫ ਜੀਆਈ ਟੈਗ ਮਿਲਿਆ ਹੈ ਬਲਕਿ ਇਸ ਨੂੰ ਅੰਤਰਰਾਸ਼ਟਰੀ ਪੱਧਰ ਤੇ ਮਾਨਤਾ ਵੀ ਪ੍ਰਾਪਤ ਹੋਈ ਹੈ।

ਜਿਵੇਂ ਪੰਜਾਬ ਵਿੱਚ ਕਿਸੇ ਵੀ ਕੰਮ ਦੀ ਸ਼ੁਰੂਆਤ ਤੋਂ ਪਹਿਲਾਂ ਲੱਡੂ ਆਉਂਦੇ ਹਨ। ਉਸੇ ਤਰ੍ਹਾਂ ਬਿਹਾਰ ਵਿੱਚ ਖਾਜਾ ਮਠਿਆਈ ਹੈ। ਜਦੋਂ ਵੀ ਇਹ ਖਾਜਾ ਦੀ ਗੱਲ ਆਉਂਦੀ ਹੈ ਤਾਂ ਰਾਜਗੀਰ ਤੇ ਨਾਲੰਦਾ ਦੇ ਵਿਚਕਾਰ ਸਥਿਤ ਸਿਲਾਵ ਦਾ ਜ਼ਿਕਰ ਨਾ ਹੋਵੇ ਇਹ ਹੋ ਹੀ ਨਹੀਂ ਸਕਦਾ। ਸਿਲਾਵ ਦਾ ਖਾਜਾ ਨਾ ਸਿਰਫ ਦੇਸ਼ ਵਿਚ, ਬਲਕਿ ਵਿਦੇਸ਼ਾਂ ਵਿੱਚ ਵੀ ਮਸ਼ਹੂਰ ਹੈ। ਇਹੀ ਕਾਰਨ ਹੈ ਕਿ ਹੁਣ ਸਿਲਾਵ ਦੀ ਮਠਿਆਈ ਆਨਲਾਈਨ ਵੀ ਵਿਕ ਰਹੀ ਹੈ। ਦੇਸ਼-ਵਿਦੇਸ਼ ਤੋਂ ਲੋਕ ਘਰ ਬੈਠ ਹੀ ਖਾਜਾ ਦਾ ਅਨੰਦ ਲੈ ਰਹੇ ਹਨ। ਖਾਜਾ ਦੇ ਕ੍ਰੇਜ਼ ਦਾ ਅੰਦਾਜਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਸਿਲਾਵ ਵਿੱਚ 300 ਰੁਪਏ ਵਿੱਚ ਵਿਕਣ ਵਾਲਾ ਖਾਜਾ ਅਮਰੀਕਾ ਵਿੱਚ 7500 ਕਿੱਲੋ ਵਿਕਦਾ ਹੈ। ਇਹ ਸਿਰਫ ਅਮਰੀਕਾ ਵਿੱਚ ਹੀ ਨਹੀਂ ਬਲਕਿ ਸਵੀਡਨ, ਇਟਲੀ ਅਤੇ ਇੰਗਲੈਂਡ ‘ਚ ਵੀ ਆਨਲਾਈਨ ਪ੍ਰਾਪਤ ਕੀਤੇ ਜਾ ਰਿਹਾ ਹੈ।

ਇੱਕ ਖਾਜਾ ਵਿੱਚ 52 ਪਰਤਾਂ ਹੁੰਦੀਆਂ ਹਨ। ਇਹ ਮਠਿਆਈ ਪੈਟੀ ਵਰਗੀ ਲੱਗਦੀ ਹੈ। ਜੋ ਖਾਣ ਵਿੱਚ ਕੁਰਕੁਰੀ ਹੁੰਦੀ ਹੈ। ਇਹ ਦੋਵੇਂ ਮਿੱਠੀ ਅਤੇ ਨਮਕੀਨ ਬਣਾਈ ਜਾਂਦੀ ਹੈ। ਇਸ ਵਿੱਚ ਆਟਾ, ਚੀਨੀ ਅਤੇ ਇਲਾਇਚੀ ਵਰਤੀ ਜਾਂਦੀ ਹੈ। ਇਸ ਨੂੰ ਰਿਫਾਇੰਡ ਜਾਂ ਦੇਸੀ ਘਿਓ ਵਿਚ ਤਿਆਰ ਕੀਤਾ ਜਾਂਦਾ ਹੈ। ਸਿਲਾਵ ਦੇ ਇੱਕ ਪਰਿਵਾਰ ਨੇ ਇਸ ਮਿਠਿਆਈ ਨੂੰ ਅੰਤਰਰਾਸ਼ਟਰੀ ਪਛਾਣ ਦਵਾਉਣ ਵਿੱਚ ਮੁੱਖ ਭੂਮਿਕਾ ਨਿਭਾਈ ਹੈ। ਨੌਜਵਾਨ ਕਾਰੋਬਾਰੀ ਸੰਜੀਵ ਕੁਮਾਰ ਦਾ ਪਰਿਵਾਰ ਪਿਛਲੇ 200 ਸਾਲਾਂ ਤੋਂ ਸਿਲਾਵ ਵਿੱਚ ਖਾਜਾ ਦੇ ਕਾਰੋਬਾਰ ਨਾਲ ਜੁੜਿਆ ਹੋਇਆ ਹੈ। ਵੈਸੇ ਤਾਂ ਉਨ੍ਹਾਂ ਦੀਆਂ ਇੱਥੇ 75 ਤੋਂ ਵੱਧ ਖਾਜਾ ਦੀਆਂ ਦੁਕਾਨਾਂ ਹਨ ਪਰ ਸੰਜੀਵ ਦੇ ਅਨੁਸਾਰ ਜਦੋਂ ਤੋਂ ਉਸਨੇ ਆਪਣੀ ਆਨਲਾਈਨ ਮਾਰਕੀਟਿੰਗ ਸ਼ੁਰੂ ਕੀਤੀ ਹੈ ਉਦੋਂ ਤੋਂ ਖਾਜਾ ਦੀ ਬਹੁਤ ਜ਼ਿਆਦਾ ਮੰਗ ਵੱਧ ਗਈ ਹੈ।

Source: abpsanjha