ਰਾਮਗੜ੍ਹੀਆ ਗਰਲਜ਼ ਕਾਲਜ ਨੇ 62ਵੇ ਅੰਤਰ ਜ਼ੋਨਲ ਯੂਥ ਅਤੇ ਵਿਰਾਸਤੀ ਮੇਲਾ ਵਿਚ ਜਿੱਤੀ ਫਸਟ ਰਨਰਅਪ ਟਰਾਫ਼ੀ

ਲੁਧਿਆਣਾ :    ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਦਾ 62ਵਾਂ ਅੰਤਰ ਜ਼ੋਨਲ ਯੂਥ ਅਤੇ ਵਿਰਾਸਤੀ ਮੇਲਾ ਏ. ਐੱਸ. ਕਾਲਜ ਖੰਨਾ ਵਿਖੇ ਆਯੋਜਿਤ ਕੀਤਾ ਗਿਆ।

ਰਾਮਗੜ੍ਹੀਆ ਕਾਲਜ ਦੇ ਲਈ ਮਾਣ ਵਾਲੀ ਗੱਲ ਹੈ ਕਿ ਕਾਲਜ ਨੇ ਇਸ ਫੈਸਟੀਵਲ ਵਿੱਚ ਪਹਿਲਾਂ ਲੁਧਿਆਣਾ ਜ਼ੋਨ ਬੀ ਦੇ ਜ਼ੋਨਲ ਯੂਥ ਅਤੇ ਵਿਰਾਸਤੀ ਮੇਲੇ ਵਿੱਚੋਂ ਸਟੇਜ ਅਤੇ ਆਫ ਸਟੇਜ ਦੇ ਵੱਖ ਵੱਖ ਮੁਕਾਬਲਿਆਂ ਵਿਚੋਂ 19 ਪਹਿਲੇ ਦਰਜੇ ਦੇ ਇਨਾਮ ਜਿੱਤ ਕੇ ਇਸ ਅੰਤਰ ਜ਼ੋਨਲ ਯੂਥ ਤੇ ਵਿਰਾਸਤੀ ਮੇਲੇ ਵਿੱਚ ਭਾਗ ਲੈ ਕੇ ਇੱਕ ਵਾਰ ਫਿਰ ਮੱਲਾਂ ਮਾਰੀਆਂ ।

ਇਸ ਫੈਸਟੀਵਲ ਵਿੱਚ 12 ਜ਼ੋਨਾਂ ਦੇ 2500 ਵਿਦਿਆਰਥੀਆਂ ਨੇ ਅਲੱਗ ਅਲੱਗ ਪ੍ਰਤੀਯੋਗਤਾਵਾਂ ਵਿਚ ਹਿੱਸਾ ਲਿਆ । ਕਾਲਜ ਦੀਆਂ ਵਿਦਿਆਰਥਣਾਂ ਨੇ ਇਹਨਾਂ ਮੁਕਾਬਲਿਆਂ ਵਿੱਚ ਭਾਗ ਲੈ ਕੇ ਕਲਾਸੀਕਲ ਡਾਂਸ, ਪੀੜ੍ਹੀ ਬਣਾਉਣ, ਗੁੱਡੀਆਂ ਪਟੋਲੇ ਤੇ ਕੁਇੰਜ਼ ਵਿੱਚ ਪਹਿਲੇ ਦਰਜੇ ਦੇ ਇਨਾਮ, ਗਰੁੱਪ ਡਾਂਸ, ਕਹਾਣੀ ਲਿਖਣ, ਇੰਡੀਅਨ ਆਰਕੈਸਟਰਾ,ਫੋਕ ਆਰਕੈਸਟਰਾ ਵਿੱਚ ਦੂਜੇ ਦਰਜੇ ਦੇ ਇਨਾਮ ਅਤੇ ਸੁੰਦਰ ਲਿਖਾਈ ਹਿੰਦੀ ਅਤੇ ਪੰਜਾਬੀ ਲੋਕ ਸਾਜ਼ ਨਾਨ ਪ੍ਰਕਸ਼ਨ, ਲੰਬੀ ਹੇਕ ਦੇ ਗੀਤ ਵਿੱਚ ਤੀਜੇ ਦਰਜੇ ਦੇ ਇਨਾਮ ਜਿੱਤ ਕੇ ਫਸਟ ਰਨਰਅਪ ਟਰਾਫ਼ੀ ਜਿੱਤੀ।