ਲੁਧਿਆਣਾ : ਪਾਵਰਕਾਮ ਵਿਭਾਗ ਵੱਲੋਂ ਬਿਜਲੀ ਚੋਰੀ ਰੋਕਣ ਲਈ ਸ਼ਹਿਰ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਲਗਾਤਾਰ ਛਾਪੇਮਾਰੀ ਕੀਤੀ ਜਾ ਰਹੀ ਹੈ। ਇਸੇ ਲੜੀ ਤਹਿਤ ਪਾਵਰਕੌਮ ਵਿਭਾਗ ਦੀਆਂ ਟੀਮਾਂ ਨੇ ਕਾਰਵਾਈ ਕਰਦਿਆਂ ਕਰੀਬ 18 ਲੱਖ ਰੁਪਏ ਦੀ ਬਿਜਲੀ ਚੋਰੀ ਫੜੀ ਹੈ।
ਪਾਵਰਕੌਮ ਵਿਭਾਗ ਦੇ ਬੁਲਾਰੇ ਅਨੁਸਾਰ ਵਿਭਾਗ ਦੀਆਂ ਟੀਮਾਂ ਨੇ ਅਗਰ ਨਗਰ ਡਵੀਜ਼ਨ ਅਧੀਨ ਪੈਂਦੇ ਪੀਏਯੂ, ਟਾਈਪ-12 ਕੁਆਟਰ, ਬਾਬਾ ਨੰਦ ਸਿੰਘ ਨਗਰ, ਆਸ਼ਿਆਨਾ ਐਨਕਲੇਵ, ਬਲਰਾਜ ਐਨਕਲੇਵ, ਜਸਿਆਣਾ ਰੋਡ, ਸਾਈਂ ਐਨਕਲੇਵ, ਲਾਦੀਆਂ ਰੋਡ ਵਿੱਚ ਛਾਪੇਮਾਰੀ ਕੀਤੀ। ਇਸ ਦੌਰਾਨ ਬਿਜਲੀ ਚੋਰੀ ਦੇ 29 ਮਾਮਲੇ ਫੜੇ ਗਏ ਅਤੇ ਕੁਝ ਮਾਮਲਿਆਂ ਵਿੱਚ ਮੌਕੇ ’ਤੇ ਹੀ ਜੁਰਮਾਨੇ ਕੀਤੇ ਗਏ।
ਬੁਲਾਰੇ ਅਨੁਸਾਰ ਵਿਭਾਗ ਬਿਜਲੀ ਚੋਰੀ ਨਾ ਕਰਨ ਦੀਆਂ ਅਪੀਲਾਂ ਕਰਦਾ ਰਹਿੰਦਾ ਹੈ ਪਰ ਕਈ ਲੋਕ ਮੰਨਦੇ ਨਹੀਂ। ਨਾਜਾਇਜ਼ ਕੁੰਡੀਆਂ ਕਾਰਨ ਕਈ ਇਲਾਕਿਆਂ ਵਿੱਚ ਬਿਜਲੀ ਸਪਲਾਈ ਵੀ ਪ੍ਰਭਾਵਿਤ ਹੋ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਬਿਜਲੀ ਚੋਰੀ ਰੋਕਣ ਜਾਂ ਲੋਡ ਤੋਂ ਵੱਧ ਬਿਜਲੀ ਦੀ ਵਰਤੋਂ ਕਰਨ ਵਾਲਿਆਂ ਖ਼ਿਲਾਫ਼ ਵਿਭਾਗ ਵੱਲੋਂ ਲਗਾਤਾਰ ਕਾਰਵਾਈ ਕੀਤੀ ਜਾਵੇਗੀ।
ਉਨ੍ਹਾਂ ਕਿਹਾ ਕਿ ਕਈ ਲੋਕਾਂ ਨੇ ਘੱਟ ਲੋਡ ਵਾਲਾ ਸੈਕਸ਼ਨ ਕਰਵਾ ਲਿਆ ਹੈ ਅਤੇ ਇਸ ਤੋਂ ਵੱਧ ਬਿਜਲੀ ਦੀ ਖਪਤ ਕਰ ਰਹੇ ਹਨ। ਵਿਭਾਗ ਦੀ ਅਜਿਹੇ ਲੋਕਾਂ ‘ਤੇ ਖਾਸ ਨਜ਼ਰ ਹੈ। ਇਸ ਮਾਮਲੇ ਵਿੱਚ ਕੁਝ ਵੀ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ।