ਫਰਜ਼ੀ ਦਸਤਾਵੇਜ਼ ਤਿਆਰ ਕਰ ਕੇ ਆਪਣੇ ਨਾਂ ਕਰਵਾਈ ਜਾਇਦਾਦ, ਪਟਵਾਰੀ ਵੀ ਨਾਮਜ਼ਦ

ਲੁਧਿਆਣਾ : ਮਹਿੰਗੀ ਜਾਇਦਾਦ ਦੇ ਅਸਲ ਮਾਲਕ ਦੀ ਮੌਤ ਮਗਰੋਂ ਫਰਜ਼ੀ ਦਸਤਾਵੇਜ਼ ਤਿਆਰ ਕਰਕੇ ਜਾਇਦਾਦ ਹੜੱਪਣ ਦੀ ਕੋਸ਼ਿਸ ਕਰਨ ਦੇ ਆਰੋਪੀ ਖਿਲਾਫ ਥਾਣਾ ਜਮਾਲਪੁਰ ਪੁਲਿਸ ਵੱਲੋਂ ਧੋਖਾਦੇਹੀ ਸਮੇਤ ਹੋਰ ਸੰਗੀਨ ਦੋਸ਼ਾਂ ਤਹਿਤ ਪਰਚਾ ਦਰਜ ਕੀਤਾ ਗਿਆ ਹੈ। ਇਸ ਵਾਰਦਾਤ ਵਿਚ ਮੁਲਜ਼ਮ ਦੀ ਮਦਦ ਕਰਨ ਵਾਲੇ ਉਸ ਸਮੇਂ ਦੇ ਪਟਵਾਰੀ ਨੂੰ ਵੀ ਪੁਲਿਸ ਵੱਲੋਂ ਨਾਮਜ਼ਦ ਕੀਤਾ ਗਿਆ ਹੈ।
ਇਸ ਮਾਮਲੇ ਵਿਚ ਜਾਣਕਾਰੀ ਦਿੰਦੇ ਹੋਏ ਸ਼ਿਕਾਇਤਕਰਤਾ ਸੰਤ ਕੁਮਾਰ ਨੇ ਦੱਸਿਆ ਕਿ ਉਸ ਦੇ ਰਿਸ਼ਤੇਦਾਰ ਤੇਜਾ ਸਿੰਘ ਨੇ ਭਾਮੀਆਂ ਵਿਚ ਇਕ ਜਾਇਦਾਦ ਖ਼ਰੀਦੀ ਸੀ। ਸਾਲ 2005 ਵਿਚ ਤੇਜਾ ਸਿੰਘ ਦੀ ਮੌਤ ਮਗਰੋਂ ਉਸ ਦੀ ਇਕਲੌਤੀ ਬੇਟੀ ਨਰਿੰਦਰ ਕੌਰ ਦੇ ਨਾਮ ਉੱਪਰ ਵਿਰਾਸਤ ਦੇ ਆਧਾਰ ਤੇ ਇਹ ਜਾਇਦਾਦ ਟਰਾਂਸਫਰ ਹੋ ਗਈ। ਕਰੀਬ ਛੇ ਸਾਲ ਪਹਿਲਾਂ ਉਨ੍ਹਾਂ ਦੇ ਪੈਰਾਂ ਹੇਠੋਂ ਜ਼ਮੀਨ ਨਿਕਲ ਗਈ ਜਦ ਉਨ੍ਹਾਂ ਜਾਇਦਾਦ ਦੀ ਫ਼ਰਦ ਕਢਵਾਈ ਅਤੇ ਫ਼ਰਦ ਵਿਚ ਉਸ ਜਾਇਦਾਤ ਦੀ ਮਾਲਕੀ ਅਸਲ ਮਾਲਕ ਨਰਿੰਦਰ ਕੌਰ ਦੀ ਬਜਾਏ ਪਿੰਡ ਕੁਲੀਏਵਾਲ ਦੇ ਰਹਿਣ ਵਾਲੇ ਜਸਪਾਲ ਸਿੰਘ ਦੇ ਨਾਮ ਚੜ੍ਹੀ ਹੋਈ ਸੀ।

ਉਨ੍ਹਾਂ ਇਸ ਸਬੰਧੀ ਪੁਲਿਸ ਦੇ ਆਲਾ ਅਧਿਕਾਰੀਆਂ ਕੋਲ ਸ਼ਿਕਾਇਤ ਦਰਜ ਕਰਵਾਈ ਤਾਂ ਸਾਹਮਣੇ ਆਇਆ ਕਿ ਆਰੋਪੀ ਜਸਪਾਲ ਸਿੰਘ ਨੇ ਉਸ ਵੇਲੇ ਦੇ ਹਲਕਾ ਪਟਵਾਰੀ ਰਜਿੰਦਰ ਸਿੰਘ ਨਾਲ ਮਿਲੀਭੁਗਤ ਕਰਕੇ ਫਰਜ਼ੀ ਦਸਤਾਵੇਜ਼ਾਂ ਦੇ ਆਧਾਰ ਤੇ ਇਹ ਜਾਇਦਾਦ ਆਪਣੇ ਨਾਮ ਚੜਵਾ ਲਈ ਸੀ। ਪੁਲਿਸ ਨੇ ਮੁਕੰਮਲ ਪੜਤਾਲ ਮਗਰੋਂ ਜਸਪਾਲ ਸਿੰਘ ਅਤੇ ਪਟਵਾਰੀ ਰਾਜਿੰਦਰ ਸਿੰਘ ਖਿਲਾਫ ਧੋਖਾਦੇਹੀ ਦੇ ਦੋਸ਼ਾਂ ਤਹਿਤ ਪਰਚਾ ਦਰਜ ਕਰ ਕੇ ਅਗਲੇਰੀ ਪੜਤਾਲ ਸ਼ੁਰੂ ਕਰ ਦਿੱਤੀ ਹੈ।