ਲੁਧਿਆਣਾ : ਉੱਤਰੀ ਰੇਲਵੇ ਦੇ ਫਿਰੋਜ਼ਪੁਰ ਮੰਡਲ ਰੇਲਵੇ ਸਟੇਸ਼ਨ ਲੁਧਿਆਣਾ ਵਿਖੇ ਅਗਨੀਪਥ ਸਕੀਮ ਦੇ ਨਾਂ ‘ਤੇ ਕੁਝ ਲੋਕਾਂ ਵੱਲੋਂ ਕੀਤੀ ਗਈ ਭੰਨਤੋੜ ਨੂੰ ਦੇਖਣ ਲਈ ਅੱਜ ਯਾਤਰੀ ਸੇਵਾ ਸੰਮਤੀ ਦੀ ਟੀਮ ਸਟੇਸ਼ਨ ‘ਤੇ ਪਹੁੰਚੀ। ਚੇਅਰਮੈਨ ਪੀ ਕੇ ਕ੍ਰਿਸ਼ਨਦਾਸ ਨੇ ਸਟੇਸ਼ਨ ਦਾ ਦੌਰਾ ਕੀਤਾ ਅਤੇ ਸਟੇਸ਼ਨ ਡਾਇਰੈਕਟਰ ਅਭਿਨਵ ਸਿੰਗਲਾ ਤੋਂ ਭੰਨਤੋੜ ਬਾਰੇ ਪੁੱਛਗਿੱਛ ਕੀਤੀ।
ਟੀਮ ਦੇ ਚੇਅਰਮੈਨ ਨੇ ਅਧਿਕਾਰੀਆਂ ਨੂੰ ਤੋੜਫੋੜ ਦੇ ਮਾਮਲੇ ਦੀ ਰਿਪੋਰਟ ਤਿਆਰ ਕਰਨ ਲਈ ਕਿਹਾ। ਚੇਅਰਮੈਨ ਪੀ ਕੇ ਕ੍ਰਿਸ਼ਨਦਾਸ ਨੇ ਵੀ ਕਈ ਯਾਤਰੀਆਂ ਨਾਲ ਗੱਲਬਾਤ ਕੀਤੀ। ਉਸਨੇ ਯਾਤਰੀਆਂ ਨੂੰ ਸਟੇਸ਼ਨ ‘ਤੇ ਉਪਲਬਧ ਸਹੂਲਤਾਂ ਬਾਰੇ ਪੁੱਛਿਆ। ਸਿਹਤ ਵਿਭਾਗ ਨੇ ਰੇਲਵੇ ਨੂੰ ਟੂਟੀਆਂ ਤੋਂ ਆ ਰਹੇ ਪਾਣੀ ਦੀ ਜਾਂਚ ਕਰਨ ਲਈ ਵੀ ਕਿਹਾ।
ਪੀ ਕੇ ਕ੍ਰਿਸ਼ਨਦਾਸ ਨੇ ਕਿਹਾ ਕਿ ਸਟੇਸ਼ਨ ‘ਤੇ ਕੁਝ ਕਮੀਆਂ ਪਾਈਆਂ ਗਈਆਂ ਹਨ। ਅਧਿਕਾਰੀਆਂ ਨੂੰ ਕਮੀਆਂ ਪੂਰੀਆਂ ਕਰਨ ਲਈ ਕਿਹਾ ਗਿਆ ਹੈ। ਇਸ ਦੇ ਨਾਲ ਹੀ ਜੋ ਲੋਕ ਚੱਲਦੀਆਂ ਰੇਲ ਗੱਡੀਆਂ ਦੇ ਪਿੱਛੇ ਦੌੜਦੇ ਹਨ ਅਤੇ ਰੇਲ ਗੱਡੀ ਚ ਚੜ੍ਹਨ ਦੀ ਕੋਸ਼ਿਸ਼ ਕਰਦੇ ਹਨ, ਉਨ੍ਹਾਂ ਨੂੰ ਰੋਕਣ ਲਈ ਆਰ ਪੀ ਐੱਫ ਅਤੇ ਜੀ ਆਰ ਪੀ ਦੇ ਅਧਿਕਾਰੀਆਂ ਨਾਲ ਬੈਠਕ ਵੀ ਕੀਤੀ ਗਈ।
ਇਸ ਦੇ ਨਾਲ ਹੀ ਰੇਲਵੇ ਸਟੇਸ਼ਨ ਤੇ ਨਿੱਜੀ ਕੰਪਨੀ ਵਲੋਂ ਚਲਾਏ ਜਾ ਰਹੇ ਪਖਾਨਿਆਂ ਦੀ ਵੀ ਜਾਂਚ ਕੀਤੀ ਗਈ । ਪਖਾਨੇ ਦੇ ਫਲੱਸ਼ ਟੈਂਕ ਨਹੀਂ ਚੱਲ ਰਹੇ ਸਨ। ਉਨ੍ਹਾਂ ਠੇਕੇਦਾਰ ਦੇ ਕੰਮ ਤੋਂ ਹੀ ਪਖਾਨਿਆਂ ਦਾ ਪ੍ਰਬੰਧ ਰੱਖਣ ਦੀਆਂ ਹਦਾਇਤਾਂ ਦਿੱਤੀਆਂ। ਟੀਮ ਦੇ ਮੈਂਬਰਾਂ ਨੇ ਜੀਆਰਪੀ ਦੇ ਸੀਸੀਟੀਵੀ ਰੂਮ ਦੀ ਵੀ ਜਾਂਚ ਕੀਤੀ।
ਟੀਮ ਦੇ ਮੈਂਬਰਾਂ ਨੇ ਦੇਖਿਆ ਕਿ ਸੀਸੀਟੀਵੀ ਕਮਰਾ ਕਾਫ਼ੀ ਛੋਟਾ ਹੈ। ਟੀਮ ਦੇ ਮੈਂਬਰਾਂ ਵੱਲੋਂ ਸਟੇਸ਼ਨ ‘ਤੇ ਕੰਟੀਨ ਦਾ ਨਿਰੀਖਣ ਕੀਤਾ ਗਿਆ। ਇਸ ਦੇ ਨਾਲ ਹੀ ਖਾਣ-ਪੀਣ ਦੀਆਂ ਚੀਜ਼ਾਂ ਦੀ ਵੀ ਜਾਂਚ ਕੀਤੀ ਗਈ। ਟੀਮ ਦੇ ਮੈਂਬਰਾਂ ਨੇ ਕੰਟੀਨ ਆਪਰੇਟਰ ਨੂੰ ਰੇਟ ਸੂਚੀ ਅਨੁਸਾਰ ਸਾਮਾਨ ਵੇਚਣ ਲਈ ਕਿਹਾ। ਸਟੇਸ਼ਨ ਤੇ ਰਿਟਾਇਰਿੰਗ ਰੂਮ ਦੀ ਹਾਲਤ ਖਸਤਾ ਹਾਲਤ ਚ ਪਾਈ ਗਈ। ਜਿਸ ਕਾਰਨ ਏ ਡੀ ਈ ਐੱਨ ਕਪਿਲ ਵਤਸ ਦੀ ਟੀਮ ਦੇ ਮੈਂਬਰਾਂ ਨੇ ਕਲਾਸ ਲਗਾਈ ਅਤੇ ਸਟੇਸ਼ਨ ਤੇ ਯਾਤਰੀਆਂ ਦੀਆਂ ਸਹੂਲਤਾਂ ਨੂੰ ਸਹੀ ਰੱਖਣ ਦੇ ਹੁਕਮ ਦਿੱਤੇ।