ਲੁਧਿਆਣਾ : 5 ਦਿਨ ਪਹਿਲਾਂ ਰੱਖੇ ਨੌਕਰ ਨੇ ਦੁਕਾਨ ਦੀ ਡੁਪਲੀਕੇਟ ਚਾਬੀ ਬਣਾ ਕੇ ਮੈਡੀਕਲ ਸਟੋਰ ‘ਚੋਂ 2 ਲੱਖ 60 ਹਜ਼ਾਰ ਰੁਪਏ ਦੀ ਨਕਦੀ ਚੋਰੀ ਕਰ ਲਈ। ਇਸ ਮਾਮਲੇ ਵਿਚ ਥਾਣਾ ਕੋਤਵਾਲੀ ਦੀ ਪੁਲਿਸ ਨੇ ਮੈਡੀਕਲ ਸਟੋਰ ਦੇ ਮਾਲਕ ਸੁਨੰਦਨ ਵਰਮਾ ਦੀ ਸ਼ਿਕਾਇਤ ਲੈ ਕੇ ਕੇਸ ਦੀ ਪੜਤਾਲ ਸ਼ੁਰੂ ਕਰ ਦਿੱਤੀ ਹੈ।
ਪੁਲਿਸ ਨੂੰ ਜਾਣਕਾਰੀ ਦਿੰਦਿਆਂ ਸੁਨੰਦਨ ਵਰਮਾ ਨੇ ਦੱਸਿਆ ਕਿ ਪਿੰਡੀ ਗਲੀ ਵਿੱਚ ਉਨ੍ਹਾਂ ਦਾ ਵਰਮਾ ਬ੍ਰਦਰ ਟ੍ਰੇਡਰਜ਼ ਨਾਮ ਦਾ ਮੈਡੀਕਲ ਸਟੋਰ ਹੈ। ਤਕਰੀਬਨ 5 ਦਿਨ ਪਹਿਲਾਂ ਉਨ੍ਹਾਂ ਨੇ ਮੈਡੀਕਲ ਸਟੋਰ ਵਿੱਚ ਮਿਅੰਕ ਨਾਮ ਦੇ ਨੌਕਰ ਨੂੰ ਰੱਖਿਆ ਸੀ। ਮਨ ਹੀ ਮਨ ਚੋਰੀ ਦੀ ਵਿਉਂਤ ਘੜੀ ਬੈਠੇ ਮਿਅੰਕ ਨੇ ਦੁਕਾਨ ਦੀ ਡੁਪਲੀਕੇਟ ਚਾਬੀਆਂ ਤਿਆਰ ਕਰਵਾਈਆਂ ਅਤੇ ਸੋਮਵਾਰ ਤੜਕੇ 5 ਵਜੇ ਦੇ ਕਰੀਬ ਦੁਕਾਨ ਦੇ ਤਾਲੇ ਖੋਲ੍ਹ ਕੇ ਅੰਦਰੋਂ 2ਲੱਖ 60 ਹਜਾਰ ਰੁਪਏ ਚੋਰੀ ਕਰ ਲਏ।
ਵਾਰਦਾਤ ਦੀਆਂ ਤਸਵੀਰਾਂ ਸੀਸੀਟੀਵੀ ਕੈਮਰਿਆ ਵਿੱਚ ਕੈਦ ਹੋ ਗਈਆਂ। ਸੋਮਵਾਰ ਸ਼ਾਮ ਨੂੰ ਸੁਨੰਦਨ ਵਰਮਾਂ ਨੇ ਜਾਂਚ ਤੋਂ ਬਾਅਦ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ। ਇਸ ਮਾਮਲੇ ਵਿੱਚ ਜਾਂਚ ਅਧਿਕਾਰੀ ਮੇਜਰ ਸਿੰਘ ਦਾ ਕਹਿਣਾ ਹੈ ਕਿ ਪੁਲਿਸ ਨੇ ਮਾਮਲੇ ਦੀ ਪੜਤਾਲ ਸ਼ੁਰੂ ਕਰ ਦਿੱਤੀ ਹੈ। ਜਾਂਚ ਦੇ ਦੌਰਾਨ ਸਾਹਮਣੇ ਆਇਆ ਹੈ ਕਿ ਸੁਨੰਦਨ ਨੇ ਮਿਅੰਕ ਦੀ ਪੁਲਿਸ ਵੈਰੀਫਿਕੇਸ਼ਨ ਨਹੀਂ ਸੀ ਕਰਵਾਈ। ਪੁਲਿਸ ਸਾਰੇ ਮਾਮਲੇ ਵਿੱਚ ਡੂੰਗਾਈ ਨਾਲ ਪੜਤਾਲ ਕਰਨ ਵਿੱਚ ਜੁੱਟ ਗਈ ਹੈ।