ਲੁਧਿਆਣਾ ਸੁਵਿਧਾ ਕੇਂਦਰ : 15 ਦਿਨਾਂ ਵਿੱਚ ਜਾਰੀ ਹੋਣ ਵਾਲਾ ਮੈਰਿਜ ਸਰਟੀਫਿਕੇਟ 16 ਮਹੀਨਿਆਂ ਬਾਅਦ ਵੀ ਨਹੀਂ ਬਣਿਆ, ਡੀਸੀ ਨੂੰ ਕੀਤੀ ਸ਼ਿਕਾਇਤ

ਲੁਧਿਆਣਾ : 15 ਦਿਨਾਂ ਵਿਚ ਸੇਵਾ ਕੇਂਦਰ ਤੋਂ ਜਾਰੀ ਹਨ ਵਾਲਾ ਮੈਰਿਜ ਸਰਟੀਫਿਕੇਟ ਬਾਬੂਆਂ ਦੀ ਲਾਪ੍ਰਵਾਹੀ ਕਾਰਨ ਬਿਨੈਕਾਰ ਨੂੰ 16 ਮਹੀਨੇ ਬੀਤ ਜਾਣ ਤੋਂ ਬਾਅਦ ਵੀ ਨਹੀਂ ਮਿਲ ਸਕਿਆ। ਹਾਲਾਂਕਿ ਮਾਮਲਾ ਡੀਸੀ ਦੀ ਅਦਾਲਤ ਵਿੱਚ ਪਹੁੰਚਣ ਤੋਂ ਬਾਅਦ, ਹੁਣ ਉਮੀਦ ਕੀਤੀ ਜਾ ਰਹੀ ਹੈ ਕਿ ਬਿਨੈਕਾਰ ਨੂੰ ਜਲਦੀ ਹੀ ਵਿਆਹ ਦਾ ਸਰਟੀਫਿਕੇਟ ਮਿਲ ਜਾਵੇਗਾ।

ਸੋਮਵਾਰ ਨੂੰ ਮਨਵਿੰਦਰ ਕੌਰ ਸਹੁਰੇ ਪ੍ਰੀਤਮ ਸਿੰਘ ਨਾਲ ਡੀ ਸੀ ਦਫਤਰ ਪਹੁੰਚੀ ਤੇ ਡੀ ਸੀ ਨੂੰ ਸਾਰੀ ਗੱਲ ਦੱਸੀ। ਉਨ੍ਹਾਂ ਨੇ ਕਿਹਾ ਕਿ ਸੁਖਵਿੰਦਰ ਸੈਣੀ ਅਤੇ ਉਸ ਦਾ ਵਿਆਹ ਅਕਤੂਬਰ 2020 ਵਿੱਚ ਹੋਇਆ ਸੀ। 7 ਜਨਵਰੀ, 2021 ਨੂ ਉਸ ਨੇ ਵਿਆਹ ਸਰਟੀਫਿਕੇਟ ਲਈ ਅਰਜ਼ੀ ਸੁਵਿਧਾ ਕੇਂਦਰ ਨੂੰ ਸੌਂਪੀ। 15 ਦਿਨਾਂ ਬਾਅਦ ਜਦੋਂ ਉਨ੍ਹਾਂ ਨੂੰ ਸਰਟੀਫਿਕੇਟ ਨਹੀਂ ਮਿਲਿਆ ਤਾਂ ਉਹ ਸੁਵਿਧਾ ਵਿਚ ਪਹੁੰਚ ਗਏ। ਕਰਮਚਾਰੀਆਂ ਨੇ ਦੱਸਿਆ ਕਿ ਉਨ੍ਹਾਂ ਦੀ ਦਰਖਾਸਤ ਤਹਿਸੀਲਦਾਰ ਨੂੰ ਭੇਜ ਦਿੱਤੀ ਗਈ ਹੈ। ਉਸ ਤੋਂ ਬਾਅਦ ਹੁਣ ਤੱਕ ਉਹ ਸੁਵਿਧਾ ਕੇਂਦਰ ਅਤੇ ਤਹਿਸੀਲਦਾਰ ਦੇ ਦਫਤਰ ਦੇ ਕਰੀਬ 50 ਚੱਕਰ ਲਗਾ ਚੁੱਕੇ ਹਨ ਪਰ ਸਰਟੀਫਿਕੇਟ ਨਹੀਂ ਮਿਲਿਆ।

ਪਹਿਲਾਂ ਤਾਂ ਸੇਵਾ ਕੇਂਦਰ ਦੇ ਕਰਮਚਾਰੀ ਕਹਿੰਦੇ ਰਹੇ ਕਿ ਇਹ ਫਾਈਲ ਤਹਿਸੀਲਦਾਰ ਦੇ ਦਫਤਰ ਤੋਂ ਵਾਪਸ ਨਹੀਂ ਆਈ ਅਤੇ ਤਹਿਸੀਲਦਾਰ ਦਫਤਰ ਦੇ ਬਾਬੂ ਕਹਿੰਦੇ ਸਨ ਕਿ ਇਕ-ਦੋ ਦਿਨਾਂ ਵਿਚ ਉਹ ਫਾਈਲ ਨੂੰ ਠੀਕ ਕਰ ਕੇ ਸੁਵਿਧਾ ਕੇਂਦਰ ਵਿਚ ਭੇਜ ਦੇਣਗੇ। ਹੁਣ ਤਹਿਸੀਲਦਾਰ ਦਫਤਰ ਦੇ ਬਾਬੂਆਂ ਦਾ ਕਹਿਣਾ ਹੈ ਕਿ ਜਿਸ ਕੰਪਿਊਟਰ ਵਿਚ ਉਸ ਦੀ ਡਾਟਾ ਫੀਡ ਸਥਿਤ ਹੈ, ਉਹ ਖਰਾਬ ਹੋ ਗਿਆ ਹੈ। ਇਸ ਤੋਂ ਬਾਅਦ ਡੀ ਸੀ ਨੇ ਸੇਵਾ ਕੇਂਦਰ ਦੇ ਇੰਚਾਰਜ ਨੂੰ ਫੋਨ ਕਰ ਕੇ ਹਦਾਇਤ ਕੀਤੀ ਕਿ ਵਿਆਹ ਦਾ ਸਰਟੀਫਿਕੇਟ ਜਾਰੀ ਕਰਨ ਤੋਂ ਤੁਰੰਤ ਬਾਅਦ ਉਸ ਨੂੰ ਇਸ ਦੀ ਸੂਚਨਾ ਦਿੱਤੀ ਜਾਵੇ।

ਡੀ ਸੀ ਦੀ ਘੁਰਕੀ ਤੋਂ ਬਾਅਦ ਸੇਵਾ ਕੇਂਦਰ ਦੇ ਬਾਬੂ ਵੀ ਸਿੱਧੇ ਹੋ ਗਏ। ਸੋਮਵਾਰ ਦੀ ਸ਼ਾਮ ਨੂੰ ਹੀ ਸੇਵਾ ਕੇਂਦਰ ਵਲੋਂ ਬਿਨੈਕਾਰਾਂ ਨੂੰ ਇੱਕ ਦਿਨ ਲਈ ਦੁਬਾਰਾ ਅਰਜ਼ੀ ਦੇਣ ਦੀ ਬੇਨਤੀ ਕੀਤੀ ਗਈ ਅਤੇ ਕਿਹਾ ਗਿਆ ਕਿ ਉਨ੍ਹਾਂ ਨੂੰ ਵਿਆਹ ਦਾ ਸਰਟੀਫਿਕੇਟ ਤੁਰੰਤ ਜਾਰੀ ਕਰ ਦਿੱਤਾ ਜਾਵੇਗਾ। ਪਹਿਲੇ ਵਿਆਹ ਦੇ ਸਰਟੀਫਿਕੇਟ ਲਈ ਅਰਜ਼ੀ ਈ-ਡਿਸਟ੍ਰਿਕਟ ਪੋਰਟਲ ‘ਤੇ ਦਿੱਤੀ ਜਾਂਦੀ ਸੀ ਹੁਣ ਨਵਾਂ ਪੋਰਟਲ ਈ-ਸਰਵਿਸ ਸ਼ੁਰੂ ਹੋ ਗਿਆ ਹੈ। ਪੁਰਾਣੀ ਐਪਲੀਕੇਸ਼ਨ ਲੱਭਣੀ ਮੁਸ਼ਕਿਲ ਹੈ, ਇਸ ਲਈ ਦੁਬਾਰਾ ਅਪਲਾਈਕੀਤਾ ਜਾਵੇ।