ਲੁਧਿਆਣਾ : ਨਗਰ ਨਿਗਮ ਘਰ-ਘਰ ਜਾ ਕੇ ਕੂੜਾ ਚੁੱਕਣ ਲਈ ਸਾਢੇ 8 ਕਰੋੜ ਰੁਪਏ ਦੇ 350 ਈ-ਰਿਕਸ਼ਾ ਖਰੀਦਣ ਜਾ ਰਿਹਾ ਹੈ। ਜੂਨ ਦੇ ਅੰਤ ਤੱਕ ਸਾਰੇ ਈ-ਰਿਕਸ਼ਾ ਨਿਗਮ ਤੱਕ ਪਹੁੰਚ ਜਾਣਗੇ। ਕੇਂਦਰ ਸਰਕਾਰ ਨੇ ਸਾਲਿਡ ਵੇਸਟ ਮੈਨੇਜਮੈਂਟ ਲਈ ਨਿਗਮ ਨੂੰ ਕਰੋੜਾਂ ਰੁਪਏ ਦੀਆਂ ਗ੍ਰਾਂਟਾਂ ਜਾਰੀ ਕੀਤੀਆਂ ਹਨ। ਇਸ ਪੈਸੇ ਨਾਲ ਸਿਰਫ ਮਸ਼ੀਨਰੀ ਖਰੀਦੀ ਜਾ ਸਕਦੀ ਹੈ। ਮਹਾਨਗਰ ਵਿਚ 95 ਵਾਰਡ ਹਨ। ਅਜਿਹੇ ‘ਚ ਇਕ ਵਾਰਡ ਦੇ ਹਿੱਸੇ ‘ਚ ਚਾਰ ਈ-ਰਿਕਸ਼ਾ ਆਉਣਗੇ।
ਜ਼ਿਕਰਯੋਗ ਹੈ ਕਿ ਨਗਰ ਨਿਗਮ ਨੇ ਘਰ-ਘਰ ਜਾ ਕੇ ਕੂੜਾ ਚੁੱਕਣ ਦੀ ਜ਼ਿੰਮੇਵਾਰੀ ਠੇਕੇਦਾਰਾਂ ਨੂੰ ਦਿੱਤੀ ਹੋਈ ਹੈ। ਠੇਕੇਦਾਰ ਸਫ਼ਾਈ ਸੇਵਕਾਂ ਨੂੰ ਰੱਖ ਕੇ ਕੂੜਾ ਇਕੱਠਾ ਕਰਦੇ ਹਨ। ਅਜਿਹੇ ਵਿਚ ਨਿਗਮ ਇਨ੍ਹਾਂ 350 ਈ-ਰਿਕਸ਼ਾ ਦੀ ਵਰਤੋਂ ਕਿਵੇਂ ਕਰੇਗਾ? ਮੰਨਿਆ ਜਾ ਰਿਹਾ ਹੈ ਕਿ ਨਿਗਮ ਸਾਲਿਡ ਵੇਸਟ ਮੈਨੇਜਮੈਂਟ ਲਈ ਨਵਾਂ ਟੈਂਡਰ ਜਾਰੀ ਕਰ ਸਕਦਾ ਹੈ। ਇਸ ਟੈਂਡਰ ਲਈ ਇਕ ਕੰਪਨੀ ਨੂੰ ਸਲਾਹਕਾਰ ਵਜੋਂ ਵੀ ਰੱਖਿਆ ਗਿਆ ਹੈ।
ਇਸ ਤੋਂ ਬਾਅਦ ਠੇਕੇ ‘ਤੇ ਕੰਮ ਕਰਨ ਵਾਲੀ ਕੰਪਨੀ ਦੀ ਜ਼ਿੰਮੇਵਾਰੀ ਹੋਵੇਗੀ ਕਿ ਉਹ ਘਰ-ਘਰ ਜਾ ਕੇ ਕੂੜਾ ਚੁੱਕਣ। ਅਜਿਹੇ ਵਿਚ ਸਵਾਲ ਇਹ ਹੈ ਕਿ ਕੀ ਨਿਗਮ 350 ਈ-ਰਿਕਸ਼ਾ ਪ੍ਰਾਈਵੇਟ ਕੰਪਨੀ ਨੂੰ ਸੌਂਪੇਗਾ? ਉਨ੍ਹਾਂ ਦੀ ਸਾਂਭ-ਸੰਭਾਲ ਕੌਣ ਕਰੇਗਾ? ਵਾਰਡ 68 ਦੇ ਕੌਂਸਲਰ ਦਾ ਕਹਿਣਾ ਹੈ ਕਿ ਨਿਗਮ ਨੇ ਈ-ਰਿਕਸ਼ਾ ਖਰੀਦਣ ਦੀ ਯੋਜਨਾ ਬਣਾਈ ਹੈ ਪਰ ਪਹਿਲਾਂ ਉਨ੍ਹਾਂ ਨੂੰ ਇਹ ਤੈਅ ਕਰਨਾ ਚਾਹੀਦਾ ਸੀ ਕਿ ਉਨ੍ਹਾਂ ਤੋਂ ਕਿੱਥੋਂ ਵਸੂਲੀ ਜਾਵੇਗੀ।
ਨਿਗਮ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਨਿਗਮ ਕੋਲ 16 ਸਬ-ਜ਼ੋਨ ਅਤੇ 23 ਕੰਪੈਕਟਰ ਸਾਈਟਾਂ ਵੀ ਹਨ। ਸਟੋਰ ਰੂਮ ਵੀ ਹਨ। ਇਨ੍ਹਾਂ ਸਾਰੀਆਂ ਥਾਵਾਂ ‘ਤੇ ਚਾਰਜਿੰਗ ਦਾ ਪ੍ਰਬੰਧ ਕੀਤਾ ਜਾ ਸਕਦਾ ਹੈ। ਉਨ੍ਹਾਂ ਦੇ ਸੰਚਾਲਨ ਦੀ ਜ਼ਿੰਮੇਵਾਰੀ ਨਿਗਮ ਦੀ ਹੈਲਥ ਬ੍ਰਾਂਚ ਦੀ ਹੋਵੇਗੀ। ਉਹ ਈ-ਰਿਕਸ਼ਾ ਕੌਣ ਚਲਾਵੇਗਾ ਅਤੇ ਉਨ੍ਹਾਂ ਦੀ ਸੁਰੱਖਿਆ ਅਤੇ ਰੱਖ-ਰਖਾਅ ਕਿਵੇਂ ਕੀਤਾ ਜਾਵੇਗਾ, ਇਸ ਲਈ ਉਹ ਯੋਜਨਾ ਤਿਆਰਕਰਨਗੇ ।