ਲੁਧਿਆਣਾ ‘ਚ ਕੁੱਤਿਆਂ ਨੇ 70 ਦਿਨਾਂ ‘ਚ 1923 ਲੋਕਾਂ ‘ਤੇ ਕੀਤਾ ਹਮਲਾ

ਲੁਧਿਆਣਾ : ਸ਼ਹਿਰ ਚ ਆਵਾਰਾ ਕੁੱਤਿਆਂ ਦੀ ਦਹਿਸ਼ਤ ਵਧਦੀ ਜਾ ਰਹੀ ਹੈ। ਗਲੀਆਂ ਚ ਕੁੱਤਿਆਂ ਦੇ ਘੁੰਮਣ ਦੇ ਡਰ ਕਾਰਨ ਲੋਕ ਬੱਚਿਆਂ ਨੂੰ ਘਰੋਂ ਬਾਹਰ ਭੇਜਣ ਤੋਂ ਕਤਰਾਉਣ ਲੱਗੇ ਹਨ। ਪਿਛਲੇ 70 ਦਿਨਾਂ ਚ ਸ਼ਹਿਰ ਚ 1923 ਲੋਕਾਂ ਨੂੰ ਆਵਾਰਾ ਕੁੱਤਿਆਂ ਨੇ ਵੱਢਿਆ ਹੈ। ਸਿਰਫ ਮਈ ਦੇ 10 ਦਿਨਾਂ ਵਿਚ ਹੀ ਕੁੱਤਿਆਂ ਨੇ 270 ਲੋਕਾਂ ਨੂੰ ਵੱਢਿਆ ਹੈ। ਅਪ੍ਰੈਲ ਵਿਚ 830 ਅਤੇ ਮਾਰਚ ਵਿਚ 823 ਲੋਕ ਕੁੱਤਿਆਂ ਦੇ ਕੱਟਣ ਤੋਂ ਬਾਅਦ ਸਿਵਲ ਹਸਪਤਾਲ ਪਹੁੰਚੇ ਸਨ।

ਸਿਵਲ ਹਸਪਤਾਲ ਦੇ ਐਂਟੀ ਰੈਬੀਜ਼ ਕਲੀਨਿਕ ‘ਚ ਰੋਜ਼ਾਨਾ 35 ਤੋਂ 40 ਲੋਕ ਐਂਟੀ ਰੇਬੀਜ਼ ਦੇ ਟੀਕੇ ਲਗਵਾਉਣ ਲਈ ਪਹੁੰਚ ਰਹੇ ਹਨ। ਐਂਟੀ-ਰੇਬੀਜ਼ ਕਲੀਨਿਕਾਂ ਦੇ ਸਟਾਫ ਨੇ ਕਿਹਾ ਕਿ ਪਿਛਲੇ ਸਾਲ ਮਾਰਚ ਵਿੱਚ 272 ਅਤੇ ਅਪ੍ਰੈਲ ਵਿੱਚ 277 ਮਾਮਲੇ ਸਾਹਮਣੇ ਆਏ ਸਨ। ਇਸ ਸਾਲ ਕੁੱਤਿਆਂ ਦੇ ਕੱਟਣ ਦੇ ਮਾਮਲਿਆਂ ਵਿੱਚ ਲਗਭਗ ਤਿੰਨ ਗੁਣਾ ਵਾਧਾ ਹੋਇਆ ਹੈ।

ਸਿਵਲ ਹਸਪਤਾਲ ਵਿਚ ਐਂਟੀ ਰੈਬੀਜ਼ ਦਾ ਟੀਕਾ ਲਗਵਾਉਣ ਲਈ ਪਹੁੰਚੇ ਜ਼ਿਆਦਾਤਰ ਬੱਚੇ ਅਤੇ ਬਜ਼ੁਰਗ ਹਨ। ਕੁੱਤੇ ਉਨ੍ਹਾਂ ਦੇ ਚਿਹਰੇ, ਹੱਥਾਂ, ਗਰਦਨ ਜਾਂ ਪਿੱਠ ‘ਤੇ ਕੱਟਦੇ ਹਨ। ਇਨ੍ਹਾਂ ਵਿਚ 5 ਤੋਂ 15 ਸਾਲ ਦੇ ਬੱਚੇ ਅਤੇ 60 ਸਾਲ ਤੋਂ ਵੱਧ ਉਮਰ ਦੇ ਬਜ਼ੁਰਗ ਸ਼ਾਮਲ ਹਨ।

ਨਸਬੰਦੀ ਪ੍ਰਾਜੈਕਟ ਅਵਾਰਾ ਕੁੱਤਿਆਂ ਦੀ ਗਿਣਤੀ ਨੂੰ ਨਿਯੰਤਰਿਤ ਕਰਨ ਲਈ ਸ਼ੁਰੂ ਕੀਤਾ ਗਿਆ ਸੀ। ਹੈਬੋਵਾਲ ਡੇਅਰੀ ਕੰਪਲੈਕਸ ਵਿਖੇ ਇਕ ਕਰੋੜ ਰੁਪਏ ਦੀ ਲਾਗਤ ਨਾਲ ਪਸ਼ੂ ਜਨਮ ਕੰਟਰੋਲ ਕੇਂਦਰ ਵੀ ਸਥਾਪਤ ਕੀਤਾ ਗਿਆ ਹੈ। ਸਥਿਤੀ ਇਹ ਹੈ ਕਿ ਇਹ ਪ੍ਰੋਜੈਕਟ ਕੱਛੂਕੁੰਮੇ ਦੀ ਚਾਲ ‘ਤੇ ਚੱਲ ਰਿਹਾ ਹੈ।

ਐਨੀਮਲ ਯੂਨੀਵਰਸਿਟੀ ਦੇ ਮਾਹਰ ਡਾ ਰਾਜੀਵ ਭੰਡਾਰੀ ਦਾ ਕਹਿਣਾ ਹੈ ਕਿ ਇਹ ਹੈਰਾਨ ਕਰਨ ਵਾਲੀ ਗੱਲ ਹੈ ਕਿ ਕੁੱਤਿਆਂ ਦੇ ਕੱਟਣ ਦੇ ਮਾਮਲਿਆਂ ਦੀ ਗਿਣਤੀ ਇੰਨੀ ਵਧ ਗਈ ਹੈ। ਅਜਿਹਾ ਲੱਗਦਾ ਹੈ ਕਿ ਝੁਲਸਦੀ ਗਰਮੀ ਕਾਰਨ ਕੁੱਤਿਆਂ ਦਾ ਵਿਵਹਾਰ ਵੀ ਬਦਲ ਰਿਹਾ ਹੈ। ਕੁਝ ਮਾਹਰਾਂ ਦਾ ਕਹਿਣਾ ਹੈ ਕਿ ਕੁੱਤਿਆਂ ਦੀ ਗਰਮੀ ਰੈਗੂਲੇਟਰੀ ਪ੍ਰਣਾਲੀ ਨੂੰ ਵਿਗਾੜਦੀ ਹੈ। ਇਸ ਨਾਲ ਕੁੱਤਾ ਹਮਲਾਵਰ ਹੋ ਜਾਂਦਾ ਹੈ।