NDA ਪ੍ਰੀਖਿਆਵਾਂ ਨੂੰ ਲੈ ਕੇ ਅਹਿਮ ਖਬਰ, ਹੈਰਾਨ ਕਰਨ ਵਾਲੇ ਅੰਕੜੇ ਜਾਰੀ

ਲੁਧਿਆਣਾ : ਯੂਨੀਅਨ ਪਬਲਿਕ ਸਰਵਿਸ ਕਮਿਸ਼ਨ ਵੱਲੋਂ ਐਤਵਾਰ ਨੂੰ ਜ਼ਿਲੇ ਦੇ ਵੱਖ-ਵੱਖ 14 ਕੇਂਦਰਾਂ ‘ਤੇ ਨੈਸ਼ਨਲ ਡਿਫੈਂਸ ਅਕੈਡਮੀ (ਐੱਨ.ਡੀ.ਏ.) ਅਤੇ ਕੰਬਾਈਡ ਡਿਫੈਂਸ ਸਰਵਿਸਿਜ਼ ਐਗਜ਼ਾਮੀਨੇਸ਼ਨ (ਸੀ.ਡੀ.ਐੱਸ.) ਦੀ ਪ੍ਰੀਖਿਆ ਲਈ ਗਈ। 9 ਪ੍ਰੀਖਿਆ ਕੇਂਦਰਾਂ ‘ਤੇ ਐਨ.ਡੀ.ਏ ਅਤੇ 5 ਕੇਂਦਰਾਂ ‘ਤੇ ਸੀ.ਡੀ.ਐਸ. ਪ੍ਰੀਖਿਆ ਹੋਈ। ਐਨ.ਡੀ.ਏ. ਇਹ ਪ੍ਰੀਖਿਆ ਦੋ ਪੜਾਵਾਂ ਵਿੱਚ ਸਵੇਰੇ 10 ਤੋਂ 12.30 ਵਜੇ ਅਤੇ 2 ਤੋਂ 4.30 ਵਜੇ ਦਰਮਿਆਨ ਰੱਖੀ ਗਈ ਸੀ ਜਦੋਂਕਿ ਸੀ.ਡੀ.ਐਸ. ਪ੍ਰੀਖਿਆ 3 ਪੜਾਵਾਂ 9 ਤੋਂ 11, 12 ਤੋਂ 2 ਅਤੇ 3 ਤੋਂ 5 ਤੱਕ ਕਰਵਾਈ ਗਈ ਸੀ। ਜਾਣਕਾਰੀ ਅਨੁਸਾਰ ਪੁਲਿਸ ਵੱਲੋਂ ਸਾਰੇ ਪ੍ਰੀਖਿਆ ਕੇਂਦਰਾਂ ਦੇ ਬਾਹਰ ਸੁਰੱਖਿਆ ਦੇ ਸਖ਼ਤ ਪ੍ਰਬੰਧ ਕੀਤੇ ਗਏ ਸਨ, ਜਦਕਿ ਨੋਡਲ ਅਫ਼ਸਰਾਂ ਵੱਲੋਂ ਵੀ ਵੱਖ-ਵੱਖ ਕੇਂਦਰਾਂ ਦਾ ਦੌਰਾ ਕੀਤਾ ਗਿਆ |

ਐਨ.ਡੀ.ਏ. ਪ੍ਰੀਖਿਆ ਲਈ ਲੁਧਿਆਣਾ ਵਿੱਚ ਦੋਵਾਂ ਗੇੜਾਂ ਵਿੱਚ ਹਰੇਕ ਪੜਾਅ ਵਿੱਚ 3299 ਉਮੀਦਵਾਰਾਂ ਨੇ ਪ੍ਰੀਖਿਆ ਦੇਣੀ ਸੀ, ਜਿਨ੍ਹਾਂ ਵਿੱਚੋਂ 2025 ਉਮੀਦਵਾਰ ਸਵੇਰ ਦੇ ਪੜਾਅ ਵਿੱਚ ਅਤੇ 1991 ਉਮੀਦਵਾਰ ਸ਼ਾਮ ਦੇ ਪੜਾਅ ਵਿੱਚ ਹਾਜ਼ਰ ਹੋਏ। ਪਹਿਲੇ ਪੜਾਅ ਵਿੱਚ 1274 ਉਮੀਦਵਾਰ ਗੈਰਹਾਜ਼ਰ ਰਹੇ ਅਤੇ ਦੂਜੇ ਪੜਾਅ ਵਿੱਚ 1308 ਉਮੀਦਵਾਰ ਗੈਰਹਾਜ਼ਰ ਰਹੇ। ਜਦੋਂ ਕਿ ਸੀ.ਡੀ.ਐਸ. ਪ੍ਰੀਖਿਆ ਦੇ ਤਿੰਨ ਗੇੜਾਂ ਵਿੱਚ 1535 ਅਤੇ 864 ਉਮੀਦਵਾਰ ਬੈਠਣ ਵਾਲੇ ਸਨ, ਜਿਨ੍ਹਾਂ ਵਿੱਚੋਂ ਪਹਿਲੇ ਪੜਾਅ ਵਿੱਚ 682, ਦੂਜੇ ਵਿੱਚ 697 ਅਤੇ ਤੀਜੇ ਪੜਾਅ ਵਿੱਚ 558 ਪ੍ਰੀਖਿਆਰਥੀ ਗੈਰਹਾਜ਼ਰ ਰਹੇ।