ਲੁਧਿਆਣਾ : ਬੀਕਾਨੇਰ ਤੋਂ ਲੁਧਿਆਣਾ ਆਏ ਹੌਜ਼ਰੀ ਕਾਰੋਬਾਰੀ ਦੇ ਸ਼ੱਕੀ ਹਾਲਾਤ ਵਿਚ ਲਾਪਤਾ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਜਾਣਕਾਰੀ ਅਨੁਸਾਰ ਲਾਪਤਾ ਹੋਏ ਨੌਜਵਾਨ ਅਭੈ ਸੁਰਾਨਾ ਦੇ ਮਾਮਾ ਅਰੁਣ ਕੁਮਾਰ ਨੇ ਦੱਸਿਆ ਕਿ ਉਸ ਦਾ ਭਾਣਜਾ ਪਿਛਲੇ ਕਾਫੀ ਸਮੇਂ ਤੋਂ ਉਸ ਨਾਲ ਹੀ ਕੰਮ ਕਰ ਰਿਹਾ ਸੀ। 10 ਦਿਨ ਪਹਿਲਾਂ ਉਹ ਬੀਕਾਨੇਰ ਆਪਣੇ ਘਰ ਗਿਆ ਸੀ।
ਮੰਗਲਵਾਰ ਸਵੇਰੇ ਉਹ ਬੀਕਾਨੇਰ ਤੋਂ ਲੁਧਿਆਣਾ ਪੁੱਜਾ ਅਤੇ ਉਸ ਨੇ ਆਪਣੀ ਮਾਂ ਨੂੰ ਫੋਨ ਕੀਤਾ ਪਰ ਉਸ ਤੋਂ ਬਾਅਦ ਨਾ ਤਾਂ ਉਹ ਘਰ ਆਇਆ ਅਤੇ ਨਾ ਹੀ ਫੈਕਟਰੀ ਪਹੁੰਚਿਆ। ਉਸ ਦਾ ਫੋਨ ਵੀ ਲਗਾਤਾਰ ਬੰਦ ਆ ਰਿਹਾ। ਕਾਫੀ ਭਾਲ ਕਰਨ ਤੋਂ ਬਾਅਦ ਜਦੋਂ ਅਭੈ ਦਾ ਪਤਾ ਨਾ ਲੱਗਿਆ ਤਾਂ ਦੇਰ ਸ਼ਾਮ ਉਸਦੇ ਪਰਿਵਾਰਕ ਮੈਂਬਰਾਂ ਨੇ ਇਸ ਦੀ ਸੂਚਨਾ ਪੁਲਿਸ ਨੂੰ ਦਿੱਤੀ।