ਪੰਜਾਬੀ
ਲੁਧਿਆਣਾ ਦੇ ਹੌਜ਼ਰੀ ਉਦਯੋਗ ਨੂੰ ਕੋਵਿਡ ਦਾ ਵੱਡਾ ਝਟਕਾ, 50 ਫੀਸਦੀ ਛੋਟ ਤੋਂ ਬਾਅਦ ਵੀ ਨਹੀਂ ਵਿੱਕ ਰਿਹਾ ਮਾਲ
ਲੁਧਿਆਣਾ : ਕੋਵਿਡ ਅਤੇ ਉਮੀਕਰੋਨ ਦੇ ਵਧਦੇ ਖਤਰੇ ਨੇ ਇਸ ਸਾਲ ਹੌਜ਼ਰੀ ਉਦਯੋਗ ਨੂੰ ਧੱਕਾ ਮਾਰਿਆ ਹੈ। ਇਸ ਸਾਲ ਸਰਦੀਆਂ ਦੇ ਕੱਪੜਿਆਂ ‘ਤੇ ਚੰਗਾ ਹੁੰਗਾਰਾ ਮਿਲਣ ਦੀ ਉਮੀਦ ਸੀ ਪਰ ਉਦਯੋਗ ਨੂੰ ਆਰਡਰ ਨਾ ਮਿਲਣ ਕਾਰਨ ਸਟਾਕ ਕਲੀਅਰੈਂਸ ਦੇ ਖਤਰੇ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਨਾਮਵਰ ਕੰਪਨੀਆਂ ਵੱਲੋਂ ਕਲੀਰੈਂਸ ਸੇਲ ਵੀ ਸ਼ੁਰੂ ਕੀਤੀ ਗਈ ਹੈ ਪਰ ਆਮ ਦਿਨਾਂ ਦੇ ਮੁਕਾਬਲੇ ਕੋਵਿਡ ਮਾਮਲਿਆਂ ਵਿੱਚ ਵਾਧੇ ਕਾਰਨ ਗਾਹਕਾਂ ਦਾ ਹੁੰਗਾਰਾ ਨਹੀਂ ਮਿਲ ਰਿਹਾ ਹੈ। ਕਈ ਗਾਰਮੈਂਟ ਕੰਪਨੀਆਂ ਵੱਲੋਂ 50 ਫੀਸਦੀ ਤੱਕ ਫਲੈਟ ਛੋਟਾਂ ਦੀ ਪੇਸ਼ਕਸ਼ ਵੀ ਕੀਤੀ ਜਾ ਰਹੀ ਹੈ। ਗਾਰਮੈਂਟ ਨਿਰਮਾਤਾ ਹੁਣ ਗਰਮੀਆਂ ਦੇ ਕੱਪੜਿਆਂ ਦੇ ਉਤਪਾਦਨ ਵਿੱਚ ਲੱਗੇ ਹੋਏ ਹਨ। ਕਈ ਕੰਪਨੀਆਂ ਵੱਲੋਂ ਡਿਸਪੈਚਿੰਗ ਵੀ ਸ਼ੁਰੂ ਹੋ ਗਈ ਹੈ।
ਇਹ ਚਿੰਤਾ ਦਾ ਵਿਸ਼ਾ ਹੈ ਕਿ ਦਸੰਬਰ ਵਿੱਚ ਠੰਢ ਅਤੇ ਜਨਵਰੀ ਵਿੱਚ ਸਰਦੀਆਂ ਦੀ ਸ਼ੁਰੂਆਤ ਦੇ ਬਾਵਜੂਦ ਗਾਹਕਾਂ ਦਾ ਹੁੰਗਾਰਾ ਨਹੀਂ ਮਿਲ ਰਿਹਾ ਹੈ। ਦੂਜੇ ਰਾਜਾਂ ਦੇ ਵਪਾਰੀ ਵੀ ਲੁਧਿਆਣਾ ਦੇ ਬਾਜ਼ਾਰਾਂ ਵਿੱਚ ਬਹੁਤ ਘੱਟ ਪਹੁੰਚੇ ਹਨ।
ਡਿਊਕ ਫੈਸ਼ਨ ਇੰਡੀਆ ਲਿਮਟਿਡ ਦੇ ਸੀਐਮਡੀ ਕੋਮਲ ਕੁਮਾਰ ਜੈਨ ਅਨੁਸਾਰ ਇਸ ਸਾਲ ਸਟਾਕ ਪੂਰੀ ਤਰ੍ਹਾਂ ਸਾਫ਼ ਨਹੀਂ ਹੋਵੇਗਾ। ਇਸ ਦਾ ਮੁੱਖ ਕਾਰਨ ਘੱਟ ਠੰਢਾ ਅਤੇ ਦੇਰੀ ਦੇ ਨਾਲ-ਨਾਲ ਓਮੀਕਰੋਨ ਅਤੇ ਕੋਵਿਡ ਮਾਮਲਿਆਂ ਵਿੱਚ ਵਾਧਾ ਹੈ। ਹੁਣ ਉਦਯੋਗ ਆਉਣ ਵਾਲੇ ਗਰਮੀਆਂ ਦੇ ਮੌਸਮ ਲਈ ਤਿਆਰੀ ਕਰ ਰਿਹਾ ਹੈ ਅਤੇ ਡਿਸਪੈਚਿੰਗ ਸ਼ੁਰੂ ਹੋ ਗਈ ਹੈ।
ਨਿਟਵੀਅਰ ਅਤੇ ਟੈਕਸਟਾਈਲ ਕਲੱਬ ਦੇ ਮੁਖੀ ਵਿਨੋਦ ਥਾਪਰ ਅਨੁਸਾਰ ਕੋਵਿਡ ਮਾਮਲੇ ਵਿੱਚ ਵਾਧੇ ਨਾਲ ਇਸ ਸਾਲ ਚੰਗੇ ਹੁੰਗਾਰੇ ਦੀਆਂ ਉਮੀਦਾਂ ਖੱਤਮ ਹੋ ਗਈਆਂ ਹਨ। ਲੋਕਾਂ ‘ਚ ਖਰੀਦਦਾਰੀ ਲਈ ਉਤਸ਼ਾਹੀ ਨਹੀਂ ਹੈ ਅਤੇ ਉਨ੍ਹਾਂ ਨੂੰ ਬਹੁਤ ਸਾਰੀਆਂ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਕਈ ਕੰਪਨੀਆਂ ਵੱਲੋਂ ਵਿਕਰੀ ਲਈ ਬੰਪਰ ਪੇਸ਼ਕਸ਼ਾਂ ਦਿੱਤੀਆਂ ਜਾ ਰਹੀਆਂ ਹਨ।
