ਲੁਧਿਆਣਾ : ਪੀ.ਏ.ਯੂ. ਦੇ ਪਸਾਰ ਸਿੱਖਿਆ ਵਿਭਾਗ ਨੇ ਟੀਵੀ/ਰੇਡੀਓ ਵਾਰਤਾ ਅਤੇ ਪਸਾਰ ਲੇਖ ਲਿਖਣ ਵਿੱਚ ਪਸਾਰ ਕਰਮੀਆਂ ਦੇ ਹੁਨਰ ਵਿਕਾਸ ਲਈ ਡਾਇਰੈਕਟੋਰੇਟ ਪਸਾਰ ਸਿੱਖਿਆ ਦੀ ਅਗਵਾਈ ਹੇਠ ’ਟੈਕਨਾਲੋਜੀ ਦੇ ਤਬਾਦਲੇ ਲਈ ਪ੍ਰਭਾਵੀ ਸੰਚਾਰ ਹੁਨਰ’ ਵਿਸੇ ’ਤੇ ਸਿਖਲਾਈ ਪ੍ਰੋਗਰਾਮ ਦਾ ਆਯੋਜਨ ਕੀਤਾ।
ਮੁੱਖ ਮਹਿਮਾਨ ਅਤੇ ਪਸਾਰ ਸਿੱਖਿਆ ਵਿਭਾਗ ਦੇ ਨਿਰਦੇਸ਼ਕ ਡਾ. ਅਸ਼ੋਕ ਕੁਮਾਰ ਨੇ ਸੰਚਾਰ ਨੂੰ ਖੇਤੀ ਸਲਾਹਕਾਰ ਪ੍ਰਣਾਲੀ ਦੀ ਜੀਵਨ ਰੇਖਾ ਅਤੇ ਪਸਾਰ ਕਰਮੀਆਂ ਲਈ ਯੋਗਤਾ ਦੀ ਮਹੱਤਤਾ ਮੰਨਿਆ। ਉਨਾਂ ਨੇ ਸਲਾਹ ਦਿੱਤੀ ਕਿ ਉਹ ਸੰਚਾਰ ਲਈ ਸਥਾਨਕ ਭਾਸਾਵਾਂ ਅਤੇ ਖੇਤਰੀ ਸ਼ਬਦਾਂ ਨੂੰ ਤਰਜੀਹ ਦੇਣ। ਉਨਾਂ ਨੇ ਕੁਦਰਤੀ ਸਰੋਤਾਂ ਦੀ ਤਬਾਹੀ ਬਾਰੇ ਵੀ ਚਿੰਤਾ ਮਹਿਸੂਸ ਕੀਤੀ ਅਤੇ ਕਿਸਾਨਾਂ ਵਿੱਚ ਸਰੋਤਾਂ ਦੀ ਸੰਭਾਲ ਲਈ ਜਾਗਰੂਕਤਾ ’ਤੇ ਜ਼ੋਰ ਦਿੱਤਾ।
ਪਸਾਰ ਸਿੱਖਿਆ ਵਿਭਾਗ ਦੇ ਮੁਖੀ ਡਾ. ਕੁਲਦੀਪ ਸਿੰਘ, ਨੇ ਕਿਸਾਨਾਂ ਨਾਲ ਜਾਣਕਾਰੀ ਅਤੇ ਸੰਚਾਰ ਦੇ ਪ੍ਰਸਾਰ ਲਈ ਤਕਨਾਲੋਜੀ ਅਤੇ ਪਸਾਰ ਸਾਧਨਾਂ ਦੀ ਪ੍ਰਭਾਵਸਾਲੀ ਵਰਤੋਂ ਬਾਰੇ ਚਰਚਾ ਕੀਤੀ। ਉਸਨੇ ਤਕਨਾਲੋਜੀ ਦੇ ਕਿਸਾਨ ਤੋਂ ਕਿਸਾਨ ਤਬਾਦਲੇ ਦੀ ਮਹੱਤਤਾ, ਅਗਾਂਹਵਧੂ ਕਿਸਾਨਾਂ ਦੀਆਂ ਸਫਲਤਾ ਦੀਆਂ ਕਹਾਣੀਆਂ, ਵਿਸਥਾਰ ਲੇਖਾਂ ਅਤੇ ਟੀਵੀ/ਰੇਡੀਓ ਵਾਰਤਾਵਾਂ ਬਾਰੇ ਵੀ ਦੱਸਿਆ।
ਅਪਰ ਨਿਰਦੇਸ਼ਕ ਸੰਚਾਰ ਡਾ. ਤੇਜਿੰਦਰ ਸਿੰਘ ਰਿਆੜ ਨੇ ਕਿਹਾ ਕਿ ਪ੍ਰਭਾਵਸਾਲੀ ਸੰਚਾਰ ਸਖਸੀਅਤ ਦੇ ਵਿਕਾਸ ਲਈ ਬਹੁਤ ਮਹੱਤਵਪੂਰਨ ਹੈ ਅਤੇ ਇਹ ਬੋਲਣ ਦੇ ਨਾਲ-ਨਾਲ ਲਿਖਤੀ ਲੇਖਾਂ ਵਿੱਚ ਵੀ ਝਲਕਦਾ ਹੈ। ਉਨਾਂ ਨੇ ਭਾਗ ਲੈਣ ਵਾਲਿਆਂ ਨੂੰ ਸਰਲ ਭਾਸ਼ਾ ਵਿੱਚ ਲੋੜ ਆਧਾਰਿਤ ਅਤੇ ਸਮੇਂ ਅਨੁਸਾਰ ਲੇਖ ਲਿਖਣ ਦੀ ਅਪੀਲ ਕੀਤੀ। ਉਸਨੇ ਟੀਵੀ ਟਾਕ/ਰੇਡੀਓ ਭਾਸ਼ਣ ਦੇਣ ਬਾਰੇ ਮਹੱਤਵਪੂਰਨ ਨੁਕਤੇ ਵੀ ਸਾਂਝੇ ਕੀਤੇ।