Connect with us

ਪੰਜਾਬੀ

 ਯੁਵਕ ਮੇਲੇ ‘ਚ ਖੇਤੀਬਾੜੀ ਕਾਲਜ ਨੇ ਓਵਰਆਲ ਟਰਾਫੀ ਜਿੱਤੀ, ਸਾਬਕਾ ਪ੍ਰੋਫੈਸਰ ਵਲੋਂ ਯੂਨੀਵਰਸਿਟੀ ਨੂੰ 70 ਲੱਖ ਰੁਪਏ ਦੇਣ ਦਾ ਐਲਾਨ

Published

on

Agriculture college won the overall trophy in the youth fair, former professor announced to give 70 lakh rupees to the university

ਲੁਧਿਆਣਾ : ਪੰਜਾਬ ਐਗਰੀਕਲਚਰਲ ਯੂਨੀਵਰਸਿਟੀ ਵਿਖੇ ਅੰਤਰ-ਕਾਲਜ ਯੁਵਕ ਮੇਲਾ ਧੂਮ ਧੜੱਕੇ ਵਾਲੇ ਮਾਹੌਲ ਅਤੇ ਜੀਵੰਤ ਪੇਸ਼ਕਾਰੀਆਂ ਨਾਲ ਸਮਾਪਤ ਹੋ ਗਿਆ। ਖੇਤੀਬਾੜੀ ਕਾਲਜ ਨੇ ਓਵਰਆਲ ਟਰਾਫੀ ਜਿੱਤੀ। ਗਿੱਧੇ ਅਤੇ ਸ਼ਾਨਦਾਰ ਭੰਗੜੇ ਦੇ ਲੋਕ ਨਾਚਾਂ ਨੇ ਇੱਕ ਸੱਭਿਆਚਾਰਕ ਮਹੌਲ ਦੀ ਉਸਾਰੀ ਕੀਤੀ । ਇਸ ਤੋਂ ਇਲਾਵਾ, ਰਵਾਇਤੀ ਪਹਿਰਾਵੇ ਵਿਚ ਹਿੱਸਾ ਲੈਣ ਵਾਲੀਆਂ ਲੜਕੀਆਂ ਦੁਆਰਾ ਸ਼ਾਨਦਾਰ ਲੰਮੀ ਹੇਕ ਵਾਲੇ ਗੀਤ ਨੇ ਹਾਜ਼ਰੀਨ ਨੂੰ ਮੰਤਰਮੁਗਧ ਕੀਤਾ।

ਇਸ ਮੌਕੇ ਮੁੱਖ ਮਹਿਮਾਨ ਇੰਸਪੈਕਟਰ ਜਨਰਲ ਆਫ ਪੁਲਿਸ, ਲੁਧਿਆਣਾ ਰੇਂਜ, ਸ੍ਰੀ ਕੌਸਤੁਭ ਸ਼ਰਮਾ (ਆਈ.ਪੀ.ਐਸ.) ਨੇ ਕਿਹਾ ਕਿ ਅਜਿਹੇ ਤਿਉਹਾਰ ਵਿਦਿਆਰਥੀਆਂ ਦੀ ਸਮਰੱਥਾ ਨੂੰ ਪ੍ਰਦਰਸ਼ਿਤ ਕਰਨ ਵਾਲੇ ਕਲਾਤਮਕ ਮੰਚ ਦਾ ਕੰਮ ਕਰਦੇ ਹਨ। ਉਨ੍ਹਾਂ ਜੇਤੂਆਂ ਨੂੰ ਵਧਾਈ ਦਿੰਦਿਆਂ ਭਾਗੀਦਾਰੀ ਦੀ ਮਹੱਤਤਾ ‘ਤੇ ਜ਼ੋਰ ਦਿੱਤਾ। ਉਸ ਨੇ ਕਿਹਾ ਕਿ ਦੂਜੇ ਲੋਕਾਂ ਦੇ ਸਾਹਮਣੇ ਅਭਿਨੈ ਕਰਨਾ, ਨੱਚਣਾ, ਵਜਾਉਣਾ ਜਾਂ ਗਾਉਣਾ ਇੱਕ ਸਾਹਸੀ ਤਜਰਬਾ ਹੈ।

ਪੀਏਯੂ ਦੇ ਇਸ ਡਾਇਮੰਡ ਜੁਬਲੀ ਸਾਲ ਤੱਕ ਜਾਣ ਵਾਲੇ ਸਫ਼ਰ ਬਾਰੇ ਗੱਲ ਕਰਦੇ ਹੋਏ ਪੀਏਯੂ ਦੇ ਵਾਈਸ-ਚਾਂਸਲਰ ਡਾ: ਸਤਿਬੀਰ ਸਿੰਘ ਗੋਸਲ ਨੇ ਕਿਹਾ ਕਿ ਇਹ ਜਸ਼ਨ ਫੈਕਲਟੀ, ਸਟਾਫ਼ ਅਤੇ ਵਿਦਿਆਰਥੀਆਂ ਨੂੰ ਨਵੇਂ ਜੋਸ਼ ਨਾਲ ਕੰਮ ਕਰਨ ਲਈ ਮੁੜ ਸੁਰਜੀਤ ਕਰਨਗੇ। ਰਾਸ਼ਟਰ-ਨਿਰਮਾਣ ਲਈ ਸਮਰਪਤ, ਯੂਨੀਵਰਸਿਟੀ ਸਭਿਆਚਾਰ ਦੇ ਨਿਰਮਾਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੀ ਹੈ।

ਉਨ੍ਹਾਂ ਵਿਦਿਆਰਥੀਆਂ ਨੂੰ ਨੈਤਿਕ ਨਿਘਾਰ, ਨਸ਼ਿਆਂ ਅਤੇ ਨਸ਼ੀਲੇ ਪਦਾਰਥਾਂ ਦੀ ਦੁਰਵਰਤੋਂ, ਹਿੰਸਾ ਅਤੇ ਹਰ ਤਰ੍ਹਾਂ ਦੀ ਅਸਹਿਣਸ਼ੀਲਤਾ ਵਿਰੁੱਧ ਸੇਧ ਦਿੰਦਿਆਂ ਕਿਹਾ ਕਿ ਅਜਿਹੇ ਵਿਕਾਰਾਂ ਦੀ ਸਾਡੇ ਆਧੁਨਿਕ, ਸੱਭਿਅਕ ਸਮਾਜ ਵਿੱਚ ਕੋਈ ਥਾਂ ਨਹੀਂ ਹੈ। ਉਨ੍ਹਾਂ ਵਿਦਿਆਰਥੀਆਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣੀ ਪ੍ਰਤਿਭਾ ਨੂੰ ਨਿਖਾਰਨ, ਆਪਣੇ ਹੌਂਸਲੇ ਬੁਲੰਦ ਰੱਖਣ ਅਤੇ ਜੀਵਨ ਵਿੱਚ ਬਿਹਤਰੀਨ ਟੀਚਾ ਰੱਖਣ। ਇਸ ਉਪਰੰਤ ਉਨ੍ਹਾਂ ਜੇਤੂਆਂ ਨੂੰ ਵਧਾਈ ਦਿੱਤੀ ਅਤੇ ਇਨਾਮ ਵੰਡੇ।

ਇੱਕ ਪਰਉਪਕਾਰੀ ਇਸ਼ਾਰੇ ਵਜੋਂ, ਡਾ: ਏ.ਐਸ. ਬਾਂਸਲ, ਸਾਬਕਾ ਪ੍ਰੋਫ਼ੈਸਰ ਅਤੇ ਮੁਖੀ, ਮਕੈਨੀਕਲ ਇੰਜਨੀਅਰਿੰਗ ਵਿਭਾਗ, ਪੀ.ਏ.ਯੂ. ਨੇ ਆਪਣੀ ਪਤਨੀ ਸ੍ਰੀਮਤੀ ਅਨੂਪ ਕੌਰ ਬਾਂਸਲ ਨਾਲ ਮਿਲ ਕੇ ਯੂਨੀਵਰਸਿਟੀ ਨੂੰ 70 ਲੱਖ ਰੁਪਏ ਦਾਨ ਕਰਨ ਦਾ ਵਾਅਦਾ ਕੀਤਾ। ਉਨ੍ਹਾਂ ਇਸ ਵਿਚੋਂ 50 ਲੱਖ ਰੁਪਏ ਉਸੇ ਦਿਨ ਹੀ ਦੇ ਦਿੱਤੇ। ਪੀਏਯੂ ਭਾਈਚਾਰੇ ਨੇ ਸਮਾਜ ਨੂੰ ਉੱਚਾ ਚੁੱਕਣ ਲਈ ਜੋੜੇ ਦੀ ਨਿਰਸਵਾਰਥ ਸੇਵਾ ਦੀ ਸ਼ਲਾਘਾ ਕੀਤੀ।

ਇਸ ਤੋਂ ਪਹਿਲਾਂ ਨਿਰਦੇਸ਼ਕ ਵਿਦਿਆਰਥੀ ਭਲਾਈ ਡਾ: ਗੁਰਮੀਤ ਸਿੰਘ ਬੁੱਟਰ ਨੇ ਆਏ ਹੋਏ ਮਹਿਮਾਨਾਂ ਨੂੰ ਜੀ ਆਇਆਂ ਆਖਿਆ ਅਤੇ ਦੱਸਿਆ ਕਿ ਪੀਏਯੂ ਨਾਮਵਰ ਕਲਾਕਾਰਾਂ ਨੂੰ ਪੈਦਾ ਕਰਨ ਦਾ ਸਿਹਰਾ ਜਾਂਦਾ ਹੈ, ਜਿਨ੍ਹਾਂ ਨੇ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਪੱਧਰ ‘ਤੇ ਨਾਮਣਾ ਖੱਟਿਆ ਹੈ।

ਇਸ ਮੌਕੇ ਪੰਜਾਬ ਰਾਜ ਕਿਸਾਨ ਅਤੇ ਖੇਤ ਮਜ਼ਦੂਰ ਕਮਿਸ਼ਨ ਦੇ ਚੇਅਰਮੈਨ ਡਾ: ਸੁਖਪਾਲ ਸਿੰਘ, ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਦੇ ਪ੍ਰਬੰਧਕੀ ਬੋਰਡ ਦੇ ਮੈਂਬਰ ਸ਼੍ਰੀਮਤੀ ਕਿਰਨਜੀਤ ਕੌਰ, ਸ ਹਰਦਿਆਲ ਸਿੰਘ ਗਜਨੀਪੁਰ ਅਤੇ ਸ਼੍ਰੀ ਅਮਨਪ੍ਰੀਤ ਸਿੰਘ ਬਰਾੜ, ਸ਼੍ਰੀ ਗੁਰਪ੍ਰੀਤ ਸਿੰਘ ਤੂਰ, ਸਾਬਕਾ ਪੁਲਿਸ ਕਮਿਸ਼ਨਰ, ਜਲੰਧਰ ਅਤੇ ਵਿਭਾਗ ਦੇ ਅਧਿਕਾਰੀ ਵਿਸ਼ੇਸ਼ ਤੌਰ ਤੇ ਸ਼ਾਮਲ ਸਨ।

ਕਾਲਜ ਆਫ਼ ਐਗਰੀਕਲਚਰਲ ਇੰਜਨੀਅਰਿੰਗ ਐਂਡ ਟੈਕਨਾਲੋਜੀ ਨੇ ਸੱਭਿਆਚਾਰਕ ਝਾਕੀ ਲਈ ਪਹਿਲਾ ਸਥਾਨ ਹਾਸਲ ਕੀਤਾ। ਸਾਹਿਤਕ ਸਮਾਗਮਾਂ ਲਈ ਟਰਾਫੀ ਕਾਲਜ ਆਫ਼ ਬੇਸਿਕ ਸਾਇੰਸਜ਼ ਐਂਡ ਹਿਊਮੈਨਟੀਜ਼ ਦੁਆਰਾ ਜਿੱਤੀ ਗਈ । ਇਸੇ ਕਾਲਜ ਦੀ ਗੁਰਕੰਵਲ ਕੌਰ ਨੂੰ ਸਰਵੋਤਮ ਬੁਲਾਰੇ ਦੇ ਨਾਲ-ਨਾਲ ਸਰਵੋਤਮ ਕਵੀ ਵਜੋਂ ਚੁਣਿਆ ਗਿਆ। ਫਾਈਨ ਆਰਟਸ ਦੀ ਟਰਾਫੀ ਕਾਲਜ ਆਫ ਕਮਿਊਨਿਟੀ ਸਾਇੰਸ ਨੂੰ ਦਿੱਤੀ ਗਈ ਅਤੇ ਕਾਲਜ ਦੀ ਅਨਾਮਿਕਾ ਕੇ. ਨੂੰ ਸਰਵੋਤਮ ਕਲਾਕਾਰ ਐਲਾਨਿਆ ਗਿਆ।

ਖੇਤੀਬਾੜੀ ਕਾਲਜ ਨੇ ਹੈਰੀਟੇਜ ਟਰਾਫੀ ਜਿੱਤੀ ਜਦੋਂ ਕਿ ਬਾਗਬਾਨੀ ਅਤੇ ਜੰਗਲਾਤ ਕਾਲਜ ਨੇ ਸੰਗੀਤ ਟਰਾਫੀ ਜਿੱਤੀ। ਬਾਗਬਾਨੀ ਕਾਲਜ ਦੇ ਵਿਸ਼ਵਜੀਤ ਸਿੰਘ ਨੂੰ ਸਰਵੋਤਮ ਗਾਇਕ ਦਾ ਇਨਾਮ ਮਿਲਿਆ। ਕਾਲਜ ਆਫ ਬੇਸਿਕ ਸਾਇੰਸਜ਼ ਐਂਡ ਹਿਊਮੈਨਟੀਜ਼ ਨੇ ਥੀਏਟਰ ਈਵੈਂਟਸਲਈ ਟਰਾਫੀ ਜਿੱਤੀ। ਸਰਵੋਤਮ ਅਦਾਕਾਰ ਪੁਰਸ਼ ਅਤੇ ਔਰਤ ਪੁਰਸਕਾਰ ਪ੍ਰਤੀਕ ਸ਼ਰਮਾ ਅਤੇ ਹਰਕੀਰਤ ਕੌਰ ਨੂੰ ਦਿੱਤੇ ਗਏ।

ਨਾਚ ਮੁਕਾਬਲਿਆਂ ਦੀ ਟਰਾਫੀ ਬਾਗਬਾਨੀ ਕਾਲਜ ਨੂੰ ਗਈ। ਖੇਤੀਬਾੜੀ ਕਾਲਜ ਦੇ ਮਨਪ੍ਰੀਤ ਸਿੰਘ ਗਿੱਲ ਅਤੇ ਬਾਗਬਾਨੀ ਕਾਲਜ ਦੀ ਹਰਕੀਰਤ ਕੌਰ ਨੂੰ ਕ੍ਰਮਵਾਰ ਸਰਵੋਤਮ ਡਾਂਸਰ (ਭੰਗੜਾ) ਅਤੇ ਸਰਵੋਤਮ ਡਾਂਸਰ (ਗਿੱਧਾ) ਐਲਾਨਿਆ ਗਿਆ।

Facebook Comments

Trending