ਪਟਿਆਲਾ: ਪਟਿਆਲਾ ਦੇ ਸ਼ਮਸ਼ਾਨਘਾਟ ਤੋਂ ਇੱਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਜਦੋਂ ਇੱਕ ਭਤੀਜਾ ਸਵੇਰੇ ਸਸਕਾਰ ਕਰਨ ਤੋਂ ਬਾਅਦ ਆਪਣੀ ਮਾਸੀ ਦੀਆਂ ਅਸਥੀਆਂ ਇਕੱਠਾ ਕਰਨ ਗਿਆ ਤਾਂ ਉਸ ਨੇ ਦੇਖਿਆ ਕਿ ਅਸਥੀਆਂ ‘ਤੇ ਕਿਸੇ ਨੇ ਜਾਦੂ-ਟੂਣਾ ਕੀਤਾ ਹੈ।
ਹੱਡੀਆਂ ਦੇ ਉਪਰੋਂ ਕੁਝ ਹਿੱਸਾ ਗਾਇਬ ਸੀ ਅਤੇ ਉਥੇ ਸ਼ਰਾਬ ਦੀਆਂ ਬੋਤਲਾਂ ਸਮੇਤ ਬੱਕਰੀਆਂ ਅਤੇ ਮੁਰਗੀਆਂ ਦੀਆਂ ਕੱਟੀਆਂ ਹੋਈਆਂ ਗਰਦਨਾਂ ਵੀ ਰੱਖੀਆਂ ਹੋਈਆਂ ਸਨ।ਮ੍ਰਿਤਕ ਦੇ ਭਤੀਜੇ ਅਨੁਸਾਰ ਉਸ ਦੀ ਮਾਸੀ ਦਾ ਨਾਂ ਪੂਜਾ ਰਾਣੀ ਹੈ, ਜਿਸ ਦਾ ਕੱਲ੍ਹ ਦੁਪਹਿਰ 1 ਵਜੇ ਸਸਕਾਰ ਕਰ ਦਿੱਤਾ ਗਿਆ ਸੀ ਅਤੇ ਜਦੋਂ ਰਾਤ ਨੂੰ ਪਰਿਵਾਰ ਵਾਲੇ ਉਥੇ ਆਏ ਤਾਂ ਦੇਖਿਆ ਕਿ ਸਭ ਕੁਝ ਠੀਕ ਸੀ ਪਰ ਜਦੋਂ ਸਵੇਰੇ ਪਰਿਵਾਰ ਪਹੁੰਚਿਆ ਤਾਂ ਉਥੇ ਮੁਰਗੇ ਸਨ ਅਤੇ ਬੱਕਰੀਆਂ ਦੀ ਕੱਟੀ ਹੋਈ ਗਰਦਨ ਅਤੇ ਇੱਕ ਸ਼ਰਾਬ ਦੀ ਬੋਤਲ ਬਰਾਮਦ ਹੋਈ ਅਤੇ ਹੱਡੀਆਂ ਖਿੱਲਰੀਆਂ ਹੋਈਆਂ ਸਨ।
ਇਸ ਤੋਂ ਬਾਅਦ ਪਰਿਵਾਰ ਨੇ ਤੁਰੰਤ ਪੁਲਸ ਨਾਲ ਸੰਪਰਕ ਕੀਤਾ ਅਤੇ ਪੁਲਸ ਨੇ ਪਰਿਵਾਰ ਨੂੰ ਭਰੋਸਾ ਦਿੱਤਾ ਕਿ ਜਿਸ ਨੇ ਵੀ ਇਹ ਸਭ ਕੀਤਾ ਹੈ, ਉਸ ਖਿਲਾਫ ਕਾਰਵਾਈ ਕੀਤੀ ਜਾਵੇਗੀ। ਪਰਿਵਾਰ ਦਾ ਕਹਿਣਾ ਹੈ ਕਿ ਜੋ ਸਾਡੇ ਨਾਲ ਹੋਇਆ, ਉਹ ਕਿਸੇ ਹੋਰ ਨਾਲ ਨਾ ਹੋਵੇ, ਇਸ ਲਈ ਸਾਨੂੰ ਇਨਸਾਫ਼ ਦਿਵਾਇਆ ਜਾਵੇ ਅਤੇ ਜਿਸ ਨੇ ਵੀ ਇੱਥੇ ਇਹ ਜਾਦੂ-ਟੂਣਾ ਕੀਤਾ ਹੈ, ਉਸ ਨੂੰ ਫੜ ਕੇ ਸਖ਼ਤ ਤੋਂ ਸਖ਼ਤ ਸਜ਼ਾ ਦਿੱਤੀ ਜਾਵੇ।
