ਲੁਧਿਆਣਾ: ਪਿੰਡ ਰਾਣੀਆ ਸਥਿਤ ਰਿਜ਼ੋਰਟ ਵਿੱਚ ਚੱਲ ਰਹੇ ਵਿਆਹ ਸਮਾਗਮ ਦੌਰਾਨ ਲਾੜੀ ਦੇ ਪਿਤਾ ਦਾ ਨਕਦੀ ਵਾਲਾ ਬੈਗ ਚੋਰੀ ਹੋ ਗਿਆ। ਸੀ.ਸੀ.ਟੀ.ਵੀ ਕੈਮਰਿਆਂ ਰਾਹੀਂ ਮੁਲਜ਼ਮਾਂ ਦਾ ਪਤਾ ਲਗਾਇਆ ਗਿਆ, ਜਿਸ ਤੋਂ ਬਾਅਦ ਪੁਲੀਸ ਨੂੰ ਸ਼ਿਕਾਇਤ ਦਿੱਤੀ ਗਈ। ਥਾਣਾ ਡੇਹਲੋਂ ਦੀ ਪੁਲੀਸ ਨੇ 3 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਫੜੇ ਗਏ ਮੁਲਜ਼ਮਾਂ ਵਿੱਚ ਘਨਈਆ ਲਾਲ, ਬਡਕ ਅਤੇ ਵਿਸ਼ਾਲ ਉਰਫ਼ ਸੋਨੀ ਸ਼ਾਮਲ ਹਨ। ਤਿੰਨੋਂ ਮੁਲਜ਼ਮ ਮੱਧ ਪ੍ਰਦੇਸ਼ ਦੇ ਰਹਿਣ ਵਾਲੇ ਹਨ ਅਤੇ ਆਟੋ ਚਲਾਉਂਦੇ ਹਨ। ਪੁਲੀਸ ਨੇ ਮੁਲਜ਼ਮਾਂ ਕੋਲੋਂ ਆਟੋ ਵੀ ਜ਼ਬਤ ਕਰ ਲਿਆ ਹੈ ਅਤੇ ਮੁਲਜ਼ਮਾਂ ਕੋਲੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ।
ਜਾਣਕਾਰੀ ਅਨੁਸਾਰ ਸਿਕੰਦਰ ਸਿੰਘ ਨੇ ਦੱਸਿਆ ਕਿ ਉਸ ਦੀ ਸਪੇਅਰ ਪਾਰਟਸ ਦੀ ਫੈਕਟਰੀ ਹੈ। 18 ਸਤੰਬਰ ਨੂੰ ਆਪਣੀ ਲੜਕੀ ਦੇ ਪਿੰਡ ਰਾਣੀਆ ਵਿਖੇ ਜੇ.ਕੇ. ਰਿਜ਼ੋਰਟ ਵਿੱਚ ਇੱਕ ਵਿਆਹ ਸੀ। ਵਿਆਹ ਸਮਾਗਮ ਦੌਰਾਨ ਉਸ ਕੋਲ ਨਕਦੀ ਅਤੇ ਕੁਝ ਸੋਨੇ ਦੇ ਗਹਿਣਿਆਂ ਵਾਲਾ ਬੈਗ ਸੀ। ਉਹ ਕੁਝ ਦੇਰ ਕੁਰਸੀ ‘ਤੇ ਬੈਠਾ ਰਿਹਾ ਅਤੇ ਬੈਗ ਨਾਲ ਵਾਲੀ ਕੁਰਸੀ ‘ਤੇ ਰੱਖ ਦਿੱਤਾ।ਕੁਝ ਸਮੇਂ ਬਾਅਦ ਉਥੋਂ ਉਸ ਦਾ ਬੈਗ ਗਾਇਬ ਸੀ। ਉਸ ਨੇ ਤੁਰੰਤ ਰਿਜ਼ੋਰਟ ਦੇ ਸੀਸੀਟੀਵੀ ਚੈੱਕ ਕੀਤੇ। ਕੈਮਰਿਆਂ ਦੀ ਜਾਂਚ ਕੀਤੀ ਗਈ ਤਾਂ ਪਤਾ ਲੱਗਾ ਕਿ ਤਿੰਨ ਨੌਜਵਾਨਾਂ ਨੇ ਆਟੋ ‘ਤੇ ਬੈਠ ਕੇ ਬੈਗ ਚੋਰੀ ਕਰ ਲਿਆ ਸੀ। ਫੁਟੇਜ ਰਾਹੀਂ ਆਟੋ ਦਾ ਨੰਬਰ ਹਾਸਲ ਕੀਤਾ ਗਿਆ, ਜਿਸ ਤੋਂ ਬਾਅਦ ਪੁਲੀਸ ਨੇ ਤਿੰਨਾਂ ਮੁਲਜ਼ਮਾਂ ਨੂੰ ਫੜ ਲਿਆ।
