ਨਵੀਂ ਦਿੱਲੀ : ਤਿਹਾੜ ਜੇਲ ‘ਚ ਕਰੀਬ 10 ਹਜ਼ਾਰ 500 ਕੈਦੀਆਂ ਦੇ ਮੈਡੀਕਲ ਚੈਕਅੱਪ ‘ਚੋਂ 125 ਕੈਦੀ ਐੱਚ.ਆਈ.ਵੀ. ਪਾਜ਼ੇਟਿਵ ਪਾਏ ਗਏ ਜਦਕਿ 200 ਕੈਦੀਆਂ ‘ਚ ਸਿਫਿਲਿਸ ਪਾਇਆ ਗਿਆ। ਇਸ ਜਾਂਚ ਤੋਂ ਬਾਅਦ ਜੇਲ੍ਹ ਪ੍ਰਸ਼ਾਸਨ ਪਹਿਲਾਂ ਨਾਲੋਂ ਜ਼ਿਆਦਾ ਸਰਗਰਮ ਅਤੇ ਚੌਕਸ ਹੋ ਗਿਆ ਹੈ। ਰਿਪੋਰਟ ਮੁਤਾਬਕ ਇਹ ਉਹੀ ਕੈਦੀ ਹਨ, ਜਿਨ੍ਹਾਂ ਨੂੰ ਜੇਲ ‘ਚ ਲਿਆਂਦੇ ਜਾਣ ‘ਤੇ ਐੱਚਆਈਵੀ ਵਾਇਰਸ ਪਾਇਆ ਗਿਆ ਸੀ।
ਰਾਜਧਾਨੀ ਦਿੱਲੀ ਦੀ ਸਭ ਤੋਂ ਵੱਡੀ ਜੇਲ੍ਹ ਅਤੇ ਦੇਸ਼ ਦੀਆਂ ਮਸ਼ਹੂਰ ਜੇਲ੍ਹਾਂ ਵਿੱਚੋਂ ਇੱਕ ਤਿਹਾੜ ਜੇਲ੍ਹ ਵਿੱਚ ਕੈਦੀਆਂ ਦੀ ਨਿਯਮਤ ਮੈਡੀਕਲ ਜਾਂਚ ਕੀਤੀ ਜਾਂਦੀ ਹੈ। ਹਾਲ ਹੀ ਵਿੱਚ ਨਵੇਂ ਡੀਜੀ ਦੇ ਆਉਣ ਤੋਂ ਬਾਅਦ ਤਿਹਾੜ ਵਿੱਚ ਜਾਂਚ ਕੀਤੀ ਗਈ ਸੀ। ਐਨਡੀਟੀਵੀ ਵਿੱਚ ਛਪੀ ਇਸ ਰਿਪੋਰਟ ਮੁਤਾਬਕ ਨਵੇਂ ਡੀਜੀ ਸਤੀਸ਼ ਗੋਲਚਾ ਵੱਲੋਂ ਤਿਹਾੜ ਜੇਲ੍ਹ ਦਾ ਚਾਰਜ ਸੰਭਾਲਣ ਤੋਂ ਬਾਅਦ ਮਈ ਅਤੇ ਜੂਨ ਦੇ ਮਹੀਨਿਆਂ ਵਿੱਚ ਇਹ ਮੈਡੀਕਲ ਚੈਕਅੱਪ ਕੀਤਾ ਗਿਆ ਸੀ। ਔਰਤਾਂ ਦਾ ਮੈਡੀਕਲ ਚੈਕਅੱਪ ਵੀ ਕੀਤਾ ਗਿਆ ਅਤੇ ਉਹ ਟੈਸਟ ਵੀ ਕੀਤੇ ਗਏ ਜੋ ਸਿਰਫ਼ ਔਰਤਾਂ ਦੀ ਸਿਹਤ ਨਾਲ ਸਬੰਧਤ ਹਨ।
ਇਸ ਦੌਰਾਨ, ਨਵੇਂ ਡੀਜੀ ਦੀ ਪਹਿਲਕਦਮੀ ‘ਤੇ ਤਿਹਾੜ ਜੇਲ੍ਹ ਦੇ ਸੁਰੱਖਿਆ ਸਰਵੇਖਣ ਵਿਭਾਗ ਨੇ ਏਮਜ਼ ਅਤੇ ਸਫਦਰਜੰਗ ਹਸਪਤਾਲ ਦੇ ਸਹਿਯੋਗ ਨਾਲ ਮਹਿਲਾ ਕੈਦੀਆਂ ਦੇ ਸਰਵਾਈਕਲ ਕੈਂਸਰ ਦੇ ਟੈਸਟ ਵੀ ਕਰਵਾਏ। ਜਿਨ੍ਹਾਂ ਪੁਰਸ਼ ਕੈਦੀਆਂ ਦੀ ਡਾਕਟਰੀ ਜਾਂਚ ਕੀਤੀ ਗਈ, ਉਨ੍ਹਾਂ ਵਿੱਚੋਂ 200 ਸਿਫਿਲਿਸ ਤੋਂ ਪੀੜਤ ਪਾਏ ਗਏ। ਟੀਬੀ ਦਾ ਕੋਈ ਕੇਸ ਨਹੀਂ ਮਿਲਿਆ।
